पणजी: राज्यात यानंतर कोणतीही दलाली पोलीस खपवून घेणार नाहीत असा थेट इशारा उत्तर गोव्याचे पोलीस अधीक्षक अक्षत कौशल यांनी दिलाय. शनिवार (दि.१९) रोजी माध्यमांशी संवाद साधताना ते बोलत होते. रोजच्या रोज होणाऱ्या या दलाली करणाऱ्यांवर पर्यटक पोलिसांसह उत्तर जिल्हा पोलिस कारवाई करत आहेत आणि ही कारवाई अशीच सुरु राहील असं अक्षत कौशल म्हणाले आहेत.

कळंगुट,हणजूण, मांद्रे यांसारख्या भागांमध्ये सध्या पर्यटक पोलीस कार्यरत आहेत. गुन्ह्यांच्या आधारे आरोपींवर दंडात्मक किंवा अटकेची कारवाई केली जाते. आतापर्यंत गोवा पोलिसांकडून केलेल्या कारवाईत उत्तर आणि दक्षिण गोव्यामधून १००० संशयित व्यक्ती आढळून आले असून यांपैकी १९३ जणांवर सार्वजनिक ठिकाणी मद्यपान केल्याबद्दल गुन्हा दाखल करण्यात आला आहे, शिवाय ५२५ प्रकरणे कचरा फेकल्याबद्दल आणि १४ प्रकरणे समुद्रकिनाऱ्यावर गाडी चालवल्याबद्दल दाखल करण्यात आला आहे. त्याचबरोबर गोवा पोलिसांनी शॅक व्यवसायिकांसोबत बैठक घेतली असल्याची माहिती एसपी अक्षत कौशल यांनी दिली.