मोपा आंतरराष्ट्रीय विमानतळ परिसरात ‘इंडिया कार रेस’ सुरू आहे. त्‍यासाठी तयार करण्‍यात आलेल्‍या ट्रॅकच्‍या मधोमध वाढलेल्‍या गवताला अचानक आग आगली व परिसरात धुराचे लोट पसरले. त्यामुळे कार रेस काही तास बंद ठेवण्यात आली. ही घटना दुपारी दोन वाजण्याच्या सुमारास घडली.

पेडणे अग्निशामन दलाच्या जवानांनी घटनास्थळी धाव घेऊन आग आटोक्यात आणली. सुके कुरण असल्यामुळे आग सर्वत्र पसरत होती. इतर साहित्य-सामानाचे काही नुकसान झाले नाही. परंतु ज्या परिसरात कार रेस सुरू आहेत, त्‍या भागात सर्वत्र धूर झाला. नाइलाजाने रेस थांबवण्‍यात आली. सकाळपासून रेस पाहण्‍यासाठी लोक दाखल झालेत. गोवेकरांसाठी हा नवीन इव्‍हेन्‍ट असल्‍याने स्‍थानिकांनीही तेथे जाणे पसंत केले. दरम्‍यान, अचानक आग व धूर पसरल्‍याने काही स्‍पर्धकांनी नाराजी व्‍यक्‍त केली, अशीही माहिती काही प्रत्‍यक्षदर्शींनी दिली. आग शमवण्यासाठी अग्निशमनचे अधिकारी नामदेव परवार यांच्या मार्गदर्शनात सुनील देसाई, ज्ञानेश्वर सावंत, फटू नाईक, विठ्ठल परब सह म्हापसा व पीर्णमधील जवानांनी शर्थीचे प्रयत्‍न केले.