अंमलबजावणी संचालनालय (Enforcement Directorate - ED) ने गोव्यातील हणजूण येथे एका प्रसिद्ध व्यावसायिकाच्या निवासस्थानावर छापा टाकला. भूमिका मंदिराच्या जवळ असलेल्या या व्यावसायिकाच्या घरी ईडीच्या पथकाने पहाटेपासूनच ही कारवाई सुरु केली असून घरातील कागदपत्रे, बँक खाती आणि आर्थिक व्यवहारांची कसून तपासणी केली जात आहे.

ईडीच्या अधिकाऱ्यांचे एक पथक अचानक या व्यावसायिकाच्या निवासस्थानी दाखल झाले. कोणत्याही प्रकारचा गोंधळ टाळण्यासाठी आणि कारवाई शांततेत पार पाडण्यासाठी स्थानिक पोलिसांची मदतही घेण्यात आल्याचे सूत्रांनी सांगितले. छापा टाकल्यानंतर लगेचच निवासस्थानाचे दरवाजे बंद करण्यात आले आणि घरातील कोणत्याही व्यक्तीला बाहेर जाण्याची किंवा आत येण्याची परवानगी देण्यात आली नाही.