वाळपई: वाळपई येथील सामाजिक आरोग्य केंद्राच्या इमारतीत शनिवारी सकाळी सुमारे ८.३० वा. छताच्या सिलिंगचा काही भाग अचानक कोसळल्याची घटना घडली. सुदैवाने या घटनेत कोणतीही जीवितहानी झाली नाही.

पेपर रजिस्टरजवळील भागात ही घटना घडली. त्यावेळी काही रुग्ण उपस्थित होते. मात्र, कोसळलेला सिलिंगच्या सिमेंटचा भाग त्यांच्या अंगावर पडला नाही, हे विशेष. सध्या मुसळधार पावसामुळे छताच्या सिमेंट पट्ट्यांमध्ये ओलावा जाऊन ते फुगल्यामुळे हा प्रकार घडल्याची शक्यता वर्तवली जात आहे.

घटनेची माहिती मिळताच आरोग्य केंद्रातील कर्मचारी तत्काळ घटनास्थळी दाखल झाले आणि उर्वरित सिलिंगचे निरीक्षण केले. भविष्यात आणखी धोका टाळण्यासाठी तत्काळ उर्वरित सिलिंग व्यवस्थित उतरवून सुरक्षिततेची खबरदारी घेण्यात आली.