डिचोली: एकीकडे संपूर्ण गोवा गणेश चतुर्थीच्या उत्साहात दंग असताना, नार्वे, डिचोली येथील एका कुटुंबासाठी ही रात्र दुर्दैवी ठरली. चतुर्थीच्या दिवशीच, म्हणजेच बुधवारी (दि. २७), रात्रीच्या वेळी कोसळणाऱ्या मुसळधार पावसामुळे एका घराची संरक्षक भिंत कोसळून मोठी हानी झाली मात्र सुदैवाने यात कुणाच्याही जीवाला इजा पोहोचलेली नाही.

रात्री उशिरा गणेश चतुर्थीचा सण साजरा करून नार्वे येथील जानकी पाडोळकर त्यांच्या घरात शांतपणे झोपल्या असताना अचानक मोठा आवाज ऐकू आला. त्यांनी बाहेर येऊन पाहिल्यावर त्यांना धक्काच बसला, कारण त्यांच्या घराची संरक्षक भिंत पूर्णपणे कोसळली होती.

या घटनेची माहिती मिळताच, स्थानिक आमदार प्रेमेंद्र शेट यांनी तात्काळ घटनास्थळी भेट देऊन पाहणी केली आणि कुटुंबाला धीर दिला. पावसाच्या वाढत्या तडाख्यामुळे नागरिकांमध्ये चिंतेचे वातावरण आहे. विशेषतः चतुर्थीसारख्या महत्त्वाच्या सणाच्या वेळी अशी घटना घडल्यामुळे कुटुंबावर दु:खाचा डोंगर कोसळला आहे.