मोरजी : घुसखोरी केल्याप्रकरणी मांद्रे पोलिसांनी बांगलादेशी महिलेला अटक केली. शनिवारी सायंकाळी साडेपाचच्या सुमारास हरमल किनारी भागातील पार्किंग तळावर शर्मिन बीबी जांतुर सिंगर (वय ३२ वर्षे) ही बांगलादेशी महिला संशयास्पद स्थितीत फिरत असल्याची तक्रार आल्यानंतर पोलिसांनी तिला ताब्यात घेतले. चौकशी केल्यावर ती बांगलादेशी असून तिच्याकडे कोणत्याही प्रकारची अधिकृत कागदपत्रे नसल्याचे दिसून आले.