फोंडा: ‘जय विठ्ठल, हरी विठ्ठल’ गजरात आडपईतील पाच दिवसांच्या विविध कुटुंबांच्या एकत्रित गणपतीचे आज रविवारी थाटात विसर्जन करण्यात आले. आकर्षक चित्ररथ मिरवणुकीसह गणपतीची विसर्जन मिरवणूक निघाली त्यात लहानथोरांचा मोठा सहभाग होता.

आडपई गावातील विविध कुटुंबांचा दरवर्षी पाच दिवसांचा गणेशोत्सव असतो. राज्यात विविध भागात विखुरलेली आडपईतील कुटुंबे गणेशोत्सव काळात एकत्रित येतात आणि उत्साहात हा गणेशोत्सव साजरा करतात. हा वैशिष्ट्यपूर्ण गणेशोत्सव पाहण्यासाठी राज्यातील विविध भागातील या कुटुंबांचे नातेवाईक, इष्ट तसेच अन्य भाविक मोठ्या संख्येने उपस्थिती लावतात. यंदा आध्यात्मिक आणि पौराणिक विषयांबरोबरच पेहलगाम येथील ऑपरेशन सिंदूरचा चित्ररथही साकारण्यात आला होता.

मोठ्या भक्तिभावपूर्ण वातावरणात गणपतींची विसर्जन मिरवणूक निघाली. यावेळी राजकीय, सामाजिक तसेच औद्योगिक क्षेत्रातील मान्यवर मंडळींनी उपस्थिती लावली होती. पूर्ण रस्त्यावर विसर्जन मिरवणूक सुरू होती. त्यानंतर दत्त मंडपात सर्व गणपती एकत्रित झाल्यानंतर विसर्जन करण्यात आले.