20 नोव्हेंबरपासून सुरू होणाऱ्या 52व्या इफ्फीत (IFFI 52th) सुप्रसिद्ध हंगेरियन चित्रपट-दिग्दर्शक बेला तार, रशियन नाट्य आणि चित्रपट दिग्दर्शक आंद्रेई कोंच्यालोवस्की आणि यंदाचे दादासाहेब फाळके पुरस्कार विजेते रजनीकांत यांचे चित्रपट दर्शकांना रिट्रोस्पेक्टिव्ह विभागात पाहायला मिळणार आहेत.

‘लॉंन्ग टेक’साठी प्रसिद्ध असलेले बेला तार कधीकधी एक शॉट घेण्यासाठी एक महिन्याचा काळदेखील घेतात. आपल्या सिनेमातल्या प्रदीर्घ (काही तर जवळजवळ अकरा मिनिटांचे) शॉटने ते एक प्रकारे ‘कॅथर्सिस’चा उदभव दर्शकांच्या मनात तयार करतात. उदाहरणार्थ त्यांनी 2011 साली बनवलेला ‘द टूरीन हॉर्स’मधला सुरुवातीचा शॉट. बर्लिन, कान, लोकांर्नो या चित्रपट महोत्सवात त्यांचे सिनेमा गाजले आहेत. अतिशय वेगळ्या दृश्य रचनांच्या शैलीतून ते आपला चित्रपट सादर करतात.

रशियन चित्रपट दिग्दर्शक आंद्रेई कोंच्यालोवस्की हॉलीवूड तसेच समकालीन रशियन चित्रपट क्षेत्रातले एक महत्त्वाचे नाव आहे. 2020 साली त्यानी दिग्दर्शित केलेला ‘डियर कॉम्रेड’ या इतिहासपटाला वेनिस महोत्सवात विशेष ज्युरी अवॉर्ड लाभला होता. त्यांच्या त्या चित्रपटाचा गौरव ‘मास्टरपीस’ अशा शब्दात झाला होता. जगभरच्या अनेक महोत्सवातून त्यांच्या चित्रपटांना पुरस्कार लाभले आहेत. या इफ्फीत अलीकडच्या काळात दिवंगत झालेले प्रसिद्ध अभिनेते सीन कॉनेरी यांनाही आदरांजली वाहण्यात येईल. ‘जेम्स बॉण्ड’ ही गाजलेली व्यक्तिरेखा सादर करणारे ते पहिले अभिनेते होते.