Milind Soman Viral Video: फिटनेस आयकॉन मिलिंद सोमण सध्या 'FitIndianRun' मुळे चर्चेत आहे. मुंबई ते गोवा असा धावण्याचा आणि सायकल चालवण्याचा प्रवास त्याने सुरू केला असून या प्रवासातील काही व्हिडीओ आणि फोटोज त्याने सोशल मीडियावर पत्नी अंकितासोबत शेअर केले आहेत. मिलिंदने सांगितले की, तो दररोज ९० किमी सायकल चालवतो आणि २० किमी धावतो.

'घाटावर घाट, घाटावर घाट' - मिलिंदचा अनुभव

सोशल मीडियावर अपडेट देताना मिलिंदने लिहिले, "दुसरा आणि तिसरा दिवस फक्त डोंगर, डोंगर, डोंगर आणि घाटावर घाट, घाटावर घाट असा होता. सलग तीन दिवस ९० किमी सायकलिंग आणि २० किमी धावणे असा अनुभव होता, खूप छान वाटतंय." लोक मला नेहमी विचारतात, 'का करतोस इतकं?' पण मला वाटतं, जर मी प्रत्येक वयात मन आणि शरीराच्या क्षमतेच्या मर्यादा शोधल्या नाहीत, तर मी खऱ्या अर्थाने जगलोच नाही किंवा देवाने दिलेल्या अद्भुत देणग्यांबद्दल कृतज्ञता व्यक्त केली नाही."

चौथ्या दिवशीचा अनुभव सांगताना मिलिंद म्हणाला, "मुंबई ते गोवा प्रवासाचा चौथा दिवस - डोंगर आणि पाऊस, डोंगर आणि पाऊस, डोंगर आणि पाऊस आणि वारा असा होता. ९० किमी सायकलिंग आणि २० किमी धावण्याच्या या दैनंदिन कामाशी शरीर जुळवून घेतल्यासारखे वाटतेय. अशा आव्हानांमधूनच मानवी मन, शरीर आणि आत्म्याची अद्भुत शक्ती आपल्याला समजते. या समजुतीतूनच जीवनाचा पूर्ण आनंद घेता येतो!"

केदारनाथचा खडतर प्रवास आणि 'फिटेस्ट जोडी'चा मान

यापूर्वी, मिलिंद आणि अंकिता यांनी केदारनाथपर्यंतची एक अध्यात्मिक आणि शारीरिकदृष्ट्या आव्हानात्मक ट्रेकिंग यात्रा केली होती. त्याचे फोटो शेअर करताना 'द रॉयल्स' अभिनेता मिलिंदने लिहिले होते, "चौमासी ते केदारनाथपर्यंत, खाम बुग्याल मार्गे १४,००० फुटांपेक्षा जास्त उंचीवरील हाथणी कोल पार करून ट्रेक केला, किती सुंदर प्रवास होता.

केदारनाथपर्यंत सुमारे ३० किमीचा प्रवास होता आणि तो पूर्ण करायला आम्हाला २ दिवस लागले. दुसऱ्या दिवशी १७ तास चढाई आणि बर्फ पार करावा लागला, पण पहाटे १ वाजता केदारनाथ मंदिर पाहण्याचा उत्साह सर्व थकवा दूर करणारा होता."