Fighter Movie Release Date: भारताच्या 75 व्या प्रजासत्ताक दिनाचे औचित्य साधून, व्हायकॉम 18 स्टुडिओ आणि मारफ्लिक्स पिक्चर्स द्वारे निर्मित आगामी अ‍ॅक्शन पॅक्ड चित्रपट 'फायटर' 25 जानेवारी 2024 रोजी प्रदर्शित होणार आहे. या चित्रपटात हृतिक रोशन (Hrithik Roshan) आणि दीपिका पदुकोण (Deepika Padukone) भारतीय वायुसेनेचे पराक्रमी पायलट साकारणार असून, अनिल कपूरही महत्त्वाच्या भूमिकेत दिसणार आहे.

भारतातील सर्वात मोठे अ‍ॅक्शनपट बनवण्यासाठी ओळखले जाणारे दिग्दर्शक सिद्धार्थ आनंद, 'फायटर'च्या निमित्ताने पहिल्यांदाच निर्मात्याच्या खुर्चीत बसत आहेत. या चित्रपटाला भव्य व आकर्षक बनवण्यासाठी निर्मात्यांनी कंबर कसली असून, प्रेक्षकांना सेल्युलॉइडवर कधीही न पाहिलेला अनुभव देण्यासाठी निर्माते सज्ज झाले आहेत. भारताच्या सशस्त्र दलांना मानवंदना देणारा हा चित्रपट, प्रजासत्ताक दिनाच्या मुहूर्तावर प्रदर्शित होणे एक सुवर्णयोग असणार आहे.

'फायटर' हा भारतातील पहिला एरियल अ‍ॅक्शन चित्रपट असून, या चित्रपटाच्या निमित्ताने हृतिक रोशन आणि दीपिका पदुकोण पहिल्यांदाच स्क्रीन शेअर करणार आहेत. निर्माता आणि व्हायकॉम 18 स्टुडिओचे सीओओ अजित अंधारे यांचा भारतीय मूळ असलेला आंतरराष्ट्रीय दर्जाचा अ‍ॅक्शन चित्रपट निर्माण करून जागतिक प्रेक्षकांना आकर्षित करण्याचा प्रयत्न आहे.

या चित्रपटाचे चित्रीकरण जगभर झाले असून, चित्रपटाच्या निर्मितीमध्ये अत्याधुनिक तंत्रे आणि तंत्रज्ञानाचा सुरेख वापर करण्यात आला आहे.

हृतिक आणि दीपिकाने तिच्या इन्स्टाग्राम अकाऊंटवरून चित्रपटाचे पोस्टर शेअर केले आहे. या पोस्टरवरच चित्रपटाची नवी रीलीज डेट दिलेली आहे. खरेतर हा चित्रपट पुढच्याच वर्षी म्हणजेच 2023 च्याच प्रजासत्ताक दिनी येणार होता. मात्र शाहरूख खान-दीपिका पदुकोनच्या बहुप्रतिक्षीत 'पठाण' या चित्रपटासाठी 'फायटर'ची रीलीज डेट पुढे ढकलण्यात आली. हे दोन्ही चित्रपट यशराज बॅनरने बनवले आहेत.