Gadar 2 Upcoming Movie: सनी देओल गदर 2 मधून प्रेक्षकांचे मनोरंजन करण्यासाठी सज्ज झाला आहे. 11 ऑगस्टला हा चित्रपट लवकरच चित्रपटगृहात दाखल होणार आहे. 22 वर्षापूर्वी गदर ब्लॉकबस्टर ठरला होता. आता गदर 2 कडून देखील अशीच अपेक्षा ठेवली जात आहे.

गदर मधील काही कलाकार सनी देओल, अमिषा पटेल हे तर गदर 2 मध्ये देखील दिसत आहेत. तारा सिंग, सकिना आणि त्याचा मुलगा चरणजित सिंग यांनी आपल्या अभिनयाने प्रेक्षकांच्या मनावर राज्य केले आहे. परंतु हा गदर मध्ये दिसलेला चरणजित आत्ता काय करतो हे तुम्हाला माहीत आहे का?

चरणजित सिंगच्या भुमिकेत दिसलेल्या मुलाचे नाव उत्कर्ष शर्मा असे असून तो प्रसिद्ध दिग्दर्शक अनिल शर्मा यांचा मुलगा आहे. 1994 साली जन्मलेल्या उत्कर्षने बालकलाकार म्हणून 'गदर: एक प्रेम कथा' या ब्लॉकबस्टर चित्रपटात काम केले आहे. त्याचबरोबर 'जिनिअस' या चित्रपटात देखील महत्वाची भूमिका निभावली आहे.

महत्वाचे म्हणजे उत्कर्ष शर्माने 22 वर्षाआधी ज्या चित्रपटात बालकलाकार म्हणून चरणजित सिंगची भूमिका निभावली होती आता गदर 2 मध्येदेखील त्याच चरणजित सिंगच्या भूमिकेत तो सनी देओल आणि अमिषा पटेल यांच्यासमवेत आपल्या अभिनयाची झलक दाखवताना दिसणार आहे. त्यामुळे प्रेक्षकांचे मनोरंजन दुप्पट होणार असून गदर मधील त्याच वक्तीरेखा पाहताना चाहत्यांना आनंद अनावर होणार असल्याचे चित्र आतापासूनच दिसून येत आहे.

दरम्यान, काही दिवसांपूर्वी गदर 2 चा ट्रेलर रिलिज झाला आहे. या ट्रेलरने सोशल मिडियावर धुमाकुळ घातला आहे. चित्रपटाचा टिझर, ट्रेलर आणि काही गाण्यांच्या रिलिजनंतर प्रेक्षकांच्या चित्रपटाकडून अपेक्षा वाढल्या आहेत. चाहते गदर 2 थिएटरमध्ये प्रदर्शित होण्याची वाट पाहत आहेत.

येत्या 11 ऑगस्टला हा चित्रपट थिएटर मध्ये प्रेक्षकांचे मनोरंजन करण्यासाठी दाखल होणार असून प्रेक्षकांचे मन जिंकण्यात हा चित्रपट यशस्वी होणार का हे पाहणे महत्वाचे ठरणार आहे. याबरोबरच आता उत्कर्ष शर्मा आपल्या भूमिकेला न्याय देणार का पाहणेदेखील प्रेक्षकांसाठी उत्सुकतेचा विषय असणार आहे.