मुंबई: विविध भूमिका करुन रसिकांच्या मनात घर करणारे प्रसिद्ध अभिनेते असरानी यांचे मुंबईत निधन झाले. वयाच्या ८४ व्या वर्षी त्यांनी अखेरचा श्वास घेतला, गेल्या काही दिवसांपासून त्यांच्यावर उपचार सुरु होते. अखेर सोमवारी (२० ऑक्टोबर) ३ वाजता त्याचे निधन झाले. अनेक विनोदी भूमिकांसाठी असरानी नेहमीच रसिक प्रेक्षकांच्या लक्षात राहतील.

सांताक्रूझ येथील स्मशानभूमित त्यांच्यावर अंत्यसंस्कार करण्यात आले. असरानींच्या अंत्यविधीसाठी त्यांच्या कुटुंबीय आणि नातेवाईकांनी उपस्थिती लावली होती. जूहू येथील खासगी रुग्णालयात त्यांच्यावर उपचार सुरु होते. त्यांच्या पश्चात पत्नी, बहीण आणि नातू असा परिवार आहे, असरानी यांचे मॅनेजर बाबुभाई थिबा यांनी याबाबत एएनआय या वृत्तसंस्थेला माहिती दिली आहे.

असरानी यांचा १ जानेवारी १९४१ रोजी जयपूर येथे जन्म झाला होता. व्हाईस आर्टिस्ट म्हणून त्यांनी ऑल इंडिया रेडिओमधून करिअरला सुरुवात केली होती. १९६२ मध्ये अभिनय क्षेत्रात करिअर करण्यासाठी ते मुंबईत आले होते. १९६६ मध्ये पुण्याच्या FTII येथून अभिनयाचे शिक्षण पूर्ण केले.