मुंबई: ‘मराठी’च्या मुद्यावरून ठाकरे बंधूंमध्ये मनोमिलन झाले आहे. शिवसेना-उद्धव बाळासाहेब ठाकरे पक्षाचे प्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे दोघे भाऊ तब्बल अठरा वर्षांनंतर प्रथमच प्राथमिक शिक्षणातील त्रिभाषा सूत्राच्या विरोधात एकत्रितपणे रस्त्यावर उतरणार आहेत.

या दोन्ही बंधूंनी युतीच्या दिशेने टाकलेले पहिले पाऊल मानले जात आहे. महाराष्ट्राला या मोर्च्याच्या निमित्ताने पाच जुलै रोजी ठाकरे बंधू एकाच व्यासपीठावर पाहायला मिळतील, अशी माहिती सूत्रांनी दिली.

उद्धव ठाकरे यांनी आंदोलनात सहभागी होण्यासाठी यापूर्वी सात जुलै ही तारीख जाहीर केली होती तर राज ठाकरे यांनीही सहाच्या ऐवजी पाच जुलैच्या दिवशी मोर्चा काढण्याची तयारी दर्शविली आहे.

आता दोन्ही भावांनी एक एक पाऊल मागे येत पाच जुलै ही तारीख निश्चित केली आहे. यासंदर्भात राज यांनीच ठाकरे गटाचे नेते संजय राऊत यांना फोन करून दोन मोर्चांऐवजी एकच मोर्चा काढावा त्यामुळे मराठी माणसाची एकजूट दिसून येईल असे सुचविले होते.

उद्धव यांनी मोर्चात सहभागी व्हावे किंवा पाच जुलै रोजी दोन्ही पक्षांनी एकत्र आंदोलन करावे असा प्रस्तावही त्यांच्याकडून देण्यात आला होता. अखेरीस दोन्ही पक्षांत पाच जुलैच्या तारखेवर मतैक्य झाल्याचे समजते. ‘‘ हिंदी भाषेला आमचा विरोध नाही. मात्र, शालेय शिक्षणात अशाप्रकारे भाषेची सक्ती करता येणार नाही. गुजरातला नेहमीप्रमाणे या सक्तीतून वगळण्यात आले आहे. या सक्तीविरोधात राज्यात वातावरण तापत आहे. सरकारही त्यांच्याकडून सादरीकरण करत आहे.

महाराष्ट्रात मराठी भाषा सक्तीची असून इतर भाषांचे पर्याय देण्यात यावेत ही महायुती सरकारची स्पष्ट भूमिका आहे. सरकारच्यावतीने वारंवार ही भूमिका मांडूनही विरोधक मात्र याबाबत अपप्रचार करत आहेत. - रवींद्र चव्हाण, भाजपचे कार्यकारी अध्यक्ष