महिमा ठोंबरे

Goa News: पूज्य साने गुरुजी साहित्यनगरी, अमळनेर, ता. 4 : केंद्रीय मंत्री नितीन गडकरी, मुख्यमंत्री एकनाथ शिंदे, गिरीश महाजन यांची अनुपस्थिती, त्याऐवजी आलेल्या मंत्र्यांनी घाईघाईत भाषणे करीत घेतलेला काढता पाय, मंत्र्यांच्या प्रस्थानानंतर मोकळे झालेले प्रेक्षागृह आणि आशयरहित भाषणे, अशा नीरस सोहळ्याने 97 व्या अखिल भारतीय मराठी साहित्य संमेलनाची रविवारी (ता. 4) सांगता झाली.

मंत्र्यांच्या सोयीसाठी घाईघाईत उरकलेल्या या समारोप सोहळ्याने या तीनदिवसीय संमेलनाचे सूप वाजले. समारोप सोहळ्याप्रसंगी संमेलनाध्यक्ष डॉ. रवींद्र शोभणे, विधान परिषदेच्या उपसभापती डॉ. नीलम गोऱ्हे, राज्याचे मराठी भाषा व शालेय शिक्षणमंत्री दीपक केसरकर, मदत व पुनर्वसनमंत्री आणि संमेलनाचे निमंत्रक अनिल पाटील, पाणीपुरवठामंत्री आणि संमेलनाचे संरक्षक गुलाबराव पाटील,

खासदार उन्मेष पाटील, अखिल भारतीय मराठी साहित्य महामंडळाच्या अध्यक्षा प्रा. उषा तांबे, संमेलनाचे कार्याध्यक्ष डॉ. अविनाश जोशी आदी उपस्थित होते.

केसरकर म्हणाले, ‘‘मराठीत खूप संमेलने होतात; पण त्या सर्व संमेलनांना एका व्यासपीठावर आणण्याची गरज आहे. नाट्य, चित्रपट अशा ज्या-ज्या माध्यमातून मराठी भाषा जगभर पोहोचते, त्या-त्या सर्वांना एकत्र आणणारा मंच तयार व्हावा, यासाठी सांस्कृतिक कार्यमंत्री सुधीर मुनगंटीवार यांच्याशी बोलणार आहे.’’