Silver Pomfret Maharashtra State Fish: खोल समुद्रात मिळणारा रुपेरी पापलेट आता महाराष्ट्राचा राज्य मासा म्हणून ओळखला जाणार आहे. महाराष्ट्र सरकारने पापलेटला (Silver Pomfrets) राज्य माशाचा दर्जा दिला आहे.

मत्स्य व्यवसाय मंत्री सुधीर मुनगंटीवार यांनी मुंबईतील मत्स्यपालन, पशुपालन तथा डेयरी क्षेत्रातील किसान क्रेडिट कार्ड या विषयासंदर्भातील राष्ट्रीय परिषदेत ही घोषणा केली.

दरम्यान, गेल्या कित्येक वर्षांपासून पापलेट माशाला राज्य मासा म्हणून अधिकृत दर्जा मिळावा यासाठी मागणी केली जात होती. पापलेट प्रजातीचे जतन करण्याच्या दृष्टीने अनेक मच्छिमार संघटनांनी तशी मागणी केली होती. राज्य सरकारने पापलेटचे महत्त्व जाणून टपाल तिकिटही जारी केले आहे.

महाराष्ट्रात कोकण किनारपट्टीवर हर्णे ते पालघर दरम्यान हा मासा मोठ्या प्रमाणात सापडतो. हा मासा काहीसा सफेद किंवा सिल्वर दिसतो. पापलेटला बाजारात मोठी मागणी असून त्यातून मोठी आर्थिक उलाढाल मोठी होते. चवीला उत्तम असलेल्या पापलेटची निर्यात देखील मोठ्या प्रमाणात होते.

पापलेटला सरंगा म्हणूनही ओळखतात. राज्यातून सर्वाधिक निर्यात या माशाची होते. मात्र, 1980 पासून त्याचे उत्पादन घटत चालले आहे. हा मासा दुर्मिळ होत चालला आहे. पालघरमधील सातपाटी येथील समुद्रात मिळणाऱ्या माशाला एक विशिष्ट चव आहे, त्यामुळे तेथील पापलेटला मोठी मागणी आहे.

महाराष्ट्राची राज्य प्रतिके

• राज्य प्राणी- शेकरु

• राज्य पक्षी- हरियाल

• राज्य फूल - ताम्हण किंवा जारूल

• राज्य फळ- आंबा