Andheri Byelection: सर्व महाराष्ट्राचे लक्ष लागून राहिलेल्या अंधेरी पोटनिवडणुकीसाठी आज एकूण पाच अर्ज दाखल झाले आहेत. यापैकी मुख्य लढत असेलल्या उद्धव ठाकरे गटाच्या ऋतुजा लटके (Rutuja Latake) आणि भाजपकडून मुरजी पटेल (Muraji Patel) यांनी उमेदवारी अर्ज भरला आहे.

याशिवाय राकेश विश्वनाथ अरोरा (क्रांतिकारी जय हिंद सेना) आणि (हिंदुस्तान जनता पार्टी), मिलिंद काशिनाथ कांबळे (अपक्ष) आणि नीना गणपत खेडेकर (अपक्ष) यांनी आपले नामनिर्देशन पत्रे निवडणूक निर्णय अधिकारी यांच्याकडे दाखल केले आहे.

ठाकरे गटाच्या वतीने शक्तीप्रदर्शन करत ऋतुजा लटके यांचा उमेदवारी अर्ज दाखल केला. यावेळी मोठ्या संख्येने ठाकरे गटाचे समर्थक आणि नेते उपस्थित होते. शिवसेना नेते आदित्य ठाकरे यावेळी उपस्थित होते. तसेच, काँग्रेसचे विधानपरिषदेचे आमदार भाई जगताप देखील उपस्थित होते. ठाकरे गटाच्या वतीने ऋतुजा लटके यांचा विजय निश्चित असल्याचे नेते सांगत आहेत.

दरम्यान, शिवसेना ठाकरे गटाच्या उमेदवार ऋतुजा लटके यांचा राजीनामा अखेर स्वीकारला आहे. उच्च न्यायालयाच्या आदेशानंतर पालिकेकडून लटकेंचा राजीनामा मंजूर झाला आहे. राजीनामा मंजूर झाल्यानंतर अंधेरी पूर्व पोटनिवडणुकीसाठी उमेदवारी अर्ज भरण्याचा लटकेंचा मार्ग मोकळा झाला. ऋतुजा लटके यांचा राजीनामा मंजूर करण्याचे आदेश मुंबई उच्च न्यायालयानं मनपाला दिले होते.