कोल्हापूर आणि सिंधूदुर्ग येथे परतीच्या पावसाने आज जोरदार हजेरी लावली. आज दुपारी वादळी वारे आणि मेघगर्जनेसह आलेल्या पावसाने अनेकांची तारांबळ उडाली. पावसामुळे शेतकऱ्यांची मात्र चांगलीच अडचण झाली आहे. सोयाबिन, भात या पिकांचे पावसामुळे नुकसान झाले आहे.

कोल्हापूरमध्ये झालेल्या वादळी पावसाचा शेतीसह अनेक ठिकाणी परिणाम दिसून आला. पावसामुळे अनेक भागात झाडे उन्मळून पडली. उजळाईवाडी ते शाहू जकात नाका ते टेंबलाई उड्डाण पूल, शिवाजी विद्यापीठ परिसर आणि शाहू मिल चौकात झाडे उन्मळून पडली. झाडे पडल्याने काही ठिकाणी वाहतूकीवर परिणाम झाला. कोल्हापूर गगनबावडा मार्गावरील दोनवडेत झाड कोसळल्याने मोठी वाहतूक कोंडी झाली. त्यामुळे कोकणात जाणारी वाहतूक खोळंबली.

सिंधुदुर्गातील कणकवली तालुक्यात देखील आज दुपारी जोरदार पावसाने हजेरी लावली. विजांचा गडगडाट आणि वादळी वाऱ्यासह आलेल्या पावसामुळे अनेक ठिकाणी विद्युत पुरवठा खंडित झाला. अचानक आलेल्या पावसाचा फटका शेतकऱ्यांना बसला आहे. पावसामुळे कापणीला आलेल्या भात शेतीचे मोठे नुकसान होणार असल्याने शेतकरी चिंतेत आहेत.