आजारी असलेला बिबट्या धापा टाकत होता मात्र, लोकं आजारी बिबट्यासोबत फोटो आणि त्याचा व्हिडिओ (Photo and Video with Sick Leopard) काढण्यात व्यस्त आहेत. असा एक व्हिडिओ सध्या सोशल मिडियावर (Social Media) चांगलाच व्हायरल होत आहे. धक्कादायक बाब म्हणजे हा आजारी बिबट्या पुढील 24 तासांत मरण पावला. अहमदनगर येथील श्रीगोंदा तालुक्यातील (Srigonda, Ahmednagar) रायगव्हाण गावातील हा व्हिडिओ आहे. या व्हायरल झालेल्या व्हिडिओ नंतर लोकांकडून बिबट्याच्या मृत्यूबाबत संताप व्यक्त केला जात आहे.

मिळालेल्या माहितीनुसार, श्रीगोंदा तालुक्यातील रायगव्हाण येथे गुरूवारी (दि.22) एका शेतात पूर्ण वाढ झालेला बिबट्या आढळून आला. मोकळ्या शेतात दिसून आलेल्या या बिबट्याला पाहण्यासाठी लोकांनी एकच गर्दी केली. आजारी असलेला बिबट्या पूर्णपणे थकलेला आणि धापा टाकत होता. त्याला जास्त वेळ डोळेही उघडे ठेवता येत नव्हते. असे असताना जमा झालेली गर्दी बिबट्यासोबत फोटो काढण्यात, त्याचा व्हिडिओ काढण्यात व्यस्त होते. तसेच, काहीजण बिबट्याला स्पर्श करताना देखील दिसत आहेत.

बिबट्या आजारी असल्याचे काही सजग नागरिकांच्या लक्षात आल्यानंतर याबाबत वनविभागाला माहिती देण्यात आली. वन विभागाच्या अधिकाऱ्यांनी बिबट्याला पकडून, त्याच्यावर औषधोपचार करण्यात आले. मात्र, उपचारादरम्यान रात्री या बिबट्याचा मृत्यू झाला. पशुवैद्यकीय अधिकाऱ्यांनी शवविच्छेदन केल असताना बिबट्याला न्यूमोनिया झाला असल्याचे निदर्शनास आले आहे.

दरम्यान, यावरून नेटकरी चांगलाच संताप व्यक्त करत आहेत. कोण माणूस कोण प्राणी असा प्रश्न पडत आहे. अशी एका नेटकऱ्याने कमेन्ट केली आहे.