Mumbai Sexual Assault Case: मुंबईतील पवई परिसरातून एक अत्यंत संतापजनक आणि धक्कादायक घटना समोर आली. किन्नर असल्याचे भासवून आणि साडी नेसून घरात घुसलेल्या नराधमाने एका महिलेवर अत्याचार केल्याचा प्रकार उघडकीस आला. घरात चाललेल्या आजारपणाचा आणि भीतीचा गैरफायदा घेत, करणी उतरवण्याच्या आणि आशीर्वादाच्या बहाण्याने आरोपीने हे नीच कृत्य केले.

मिळालेल्या माहितीनुसार, ही घटना 19 ऑगस्ट रोजी घडली. 30 वर्षीय आरोपी अनिल शिंदे साडी परिधान करुन आणि किन्नराचा वेश धारण करुन पवईतील एका उच्चभ्रू सोसायटीत शिरला. सुरक्षा रक्षकाचा विश्वास संपादन करुन त्याने इमारतीत प्रवेश केला आणि थेट तिसऱ्या मजल्यावरील एका फ्लॅटचा दरवाजा ठोठावला. रुग्णालयात उपचार घेत असलेल्या पतीला ठीक करण्याचे आणि वाईट नजर उतरवण्याचे अमिष दाखवून त्याने घरातील महिलेचा विश्वास जिंकला. घरात प्रवेश करताच त्याने महिलेवर पाणी शिंपडले, तिला धमकावले आणि तिच्यावर लैंगिक अत्याचार केला. इतकेच नाही तर जाता जाता तो पीडितेकडून 2000 रुपये घेऊन पसार झाला.

पीडित महिलेने (Women) तातडीने पोलिसांत धाव घेतल्यानंतर पवई पोलिसांनी या घटनेचे गांभीर्य ओळखून तपास सुरु केला. इमारतीतील आणि परिसरातील सीसीटीव्ही फुटेज तपासले असता, आरोपी साडीतच एका रिक्षातून ठाण्याच्या दिशेने पळून जाताना दिसला. पोलिसांनी रिक्षाच्या क्रमांकावरुन चालकाचा शोध घेतला आणि माग काढत कळवा परिसरातून अनिल शिंदेला बेड्या ठोकल्या.

पोलीस तपासात आरोपी अनिल शिंदे आणि त्याचे कुटुंब किन्नर किंवा भिकाऱ्यांचे रुप धारण करुन मागण्याचे काम करत असल्याचे आणि आरोपीने पूर्वीही अशा प्रकारे वेश बदलून गुन्हे केल्याचे उघडकीस आले. सध्या आरोपी पोलिसांच्या ताब्यात असून त्याच्यावर बलात्कार, धमकी आणि इतर गंभीर कलमांखाली गुन्हा दाखल करण्यात आला आहे. तसेच या प्रकरणात जादूटोणाविरोधी कायद्यांतर्गत अतिरिक्त कलमे लावण्याची प्रक्रिया सुरु आहे.