महाराष्ट्रातील राजकीय गदारोळात मुंबईत चार मजली इमारत कोसळली. इमारत कोसळल्यानंतर संपूर्ण परिसरात भीतीचे वातावरण निर्माण झाले होते. काही वेळातच इमारतीभोवती मोठा जमाव जमला. स्थानिक लोकही मदत आणि बचाव कार्यात गुंतले आहेत. अपघाताची माहिती मिळताच बचाव पथक घटनास्थळी पोहोचले आणि ढिगाऱ्यात अडकलेल्या लोकांना बाहेर काढण्याचे प्रयत्न सुरू केले. (Mumbai Building Collapse News)

बीएमसीच्या म्हणण्यानुसार, आतापर्यंत 7 लोकांना बाहेर काढण्यात आले असुन एकाचा मृत्यू झाला आहे. इमारतीच्या (Building) ढिगाऱ्याखाली अजूनही 20 ते 25 लोक अडकल्याची भीती व्यक्त करण्यात येत आहे. सध्या मदत आणि बचावकार्य सुरू आहे. बीएमसीने इमारत रिकामी करण्याच्या सूचना देऊनही सुमारे 10 कुटुंबांनी इमारत रिकामी केली नाही.

*आदित्य ठाकरे घटनास्थळी पोहोचले

आदित्य ठाकरे (Aaditya Thackeray) यांनी घटनास्थळी पोहोचून परिस्थितीचा आढावा घेतला. यावेळी त्यांनी सांगितले की, ढिगाऱ्याखालून 5 ते 7 जणांना बाहेर काढण्यात आले आहे. या लोकांना नोटिसा बजावण्यात आल्या होत्या, तरीही हे लोक त्यात राहत असल्याचे त्यांनी सांगितले. सर्वांना वाचवणे हे आमचे प्राधान्य आहे.