Banda : गोवा बनावटीच्या दारुची बेकायदा वाहतूक करणाऱ्या कंटेनरवर राज्य उत्पादन शुल्क खात्याच्या कुडाळ भरारी पथकाने कारवाई केली आहे. ही कारवाई शुक्रवारी सांयंकाळी मुंबई-गोवा महामार्गावरील इन्सुली तपासणी नाक्यावर करण्यात आली. या कारवाईत तब्बल 2 कोटी 12 लाख 32 हजारांचा मुद्देमाल जप्त करण्यात आला आहे.

याबाबत अधिक माहिती अशी की, गोवा बनावटीच्या दारुची बेकायदा वाहतूक होणार असल्याची खात्री लायक माहिती राज्य उत्पादन शुल्क खात्याच्या कुडाळ पथकाला होती. त्यानुसार त्या वाहनावर गेले काही दिवस पोलिस करडी नजर ठेवून होते.

शुक्रवारी सायंकाळी मुंबई-गोवा महामार्गावरील इन्सुली तपासणी नाक्यावर एमएच 12 एलटी 7617 हा कंटेनर आला असता त्याला तपासणीसाठी थांबवले. यावेळी कंटेनरची तपासणी केली असता मोठ्या प्रमाणात दारूसाठा असल्याचे उघड झाले.

या कारवाईत गोवा राज्यात निर्मिती केलेली दारु जप्त करण्यात आली. या कारवाईत संशयित राजशेखर सोमशेखर परगी (41) ,(वाहनचालक) रा. ओल्ड हूबळी ता.हुबळी जि.धारवाड, कर्नाटक व संशयित रहमतुल्लाह कासीम खान,(41) (वाहनक्लिनर) रा. कल्लमानगर ता. यल्लापूर उत्तरकन्नडा, कारवार, कर्नाटक यांना वाहनासह ताब्यात घेण्यात आले आहे.

या कारवाईत 1 कोटी 87 लाख 20 हजार रुपयांची दारु तर 25 लाखाचा कंटेनर व इतर मुद्देमाल 12 हजार असा एकूण 2 कोटी 12 लाख 32 हजारांचा मुद्देमाल जप्त करण्यात आला आहे.