पुणे : एक काळ असा होता की मुलींना ओझे मानले जायचे. एवढेच नाही तर मुलीला जहराची पुडी म्हणून संबोधले जायचे, मुलगी जन्माला आल्याने कुटुंब दु:खी व्हायचे, घरातील सुनेवर वंशाचा दिवा मुलगाच पाहिजे म्हणून दबाव असायचा. पण आता काळ बदलला आहे. मुलगी ओझे नसून आई-वडिलांची लाडाची लेक झाली आहे. मुलीच्या जन्माने आता घरात हर्ष बघायला मिळतो. आता अनेक आई-वडील मुलीच्या जन्माचा आनंद साजरा करतात. महाराष्ट्राच्या (Maharashtra) पुणे जिल्ह्यात मुलीच्या जन्मामुळे कुटुंब इतके आनंदित झाले की तिच्या स्वागताची जोरदार तयारी करण्यात आली आणि तिला हेलिकॉप्टरने घरी आणण्यात आले.

एएनआय या वृत्तसंस्थेने दिलेल्या माहितीनुसार, पुण्यातील शेलगाव येथील जरेकर कुटुंबीयांनी मुलीच्या जन्मामुळे आनंदी होऊन तिला हेलिकॉप्टरने गावात आणले. नवजात मुलीचे वडील विशाल जरेकर यांनी सांगितले की, आमच्या संपूर्ण कुटुंबात एकही मुलगी नव्हती. त्यामुळे मुलीच्या जन्मानंतर तिचे स्वागत खास करण्यासाठी आम्ही हेलिकॉप्टरची व्यवस्था करून तिला घरी आणले. एएनआयने शेअर केलेल्या या व्हिडिओमध्ये मुलीचे वडील तिला हेलिकॉप्टरने घेऊन गावात उतरले आणि तेथे उपस्थित कुटुंबीयांनी मुलीचे स्वागत केल्याचे दिसून येते.

या हेलिकॉप्टर राईडसाठी कुटुंबाने एक लाख रुपये खर्च केले. मात्र, एखाद्या कुटुंबाने मुलीचा जन्म अशा पद्धतीने साजरा करण्याची ही पहिलीच वेळ नाही. याआधी राजस्थानमधील नागौरमध्ये एका कुटुंबाने मुलीच्या जन्माचा असाच उत्सव साजरा केला होता. येथे 35 वर्षांनंतर एका शेतकरी कुटुंबात मुलगी जन्माला आली आणि कुटुंबीयांनी मुलीला तिच्या माहेरच्या घरातून हेलिकॉप्टरमध्ये बसवून घरी आणले होते.