महाराष्ट्र Covid19 Restrictions : कर्नाटक - महाराष्ट्र राष्ट्रीय महामार्गावरील कोगनोळी नजीक असणाऱ्या कर्नाटक सीमा तपासणी नाक्यावर महाराष्ट्र तसेच इतर राज्यातून येणाऱ्या प्रवाशांची आरटीपीसीआर RTPCR चाचणी बंधनकारक केली असून सध्या नाक्यावर तपासणी चालू आहे. रक्षरिय महामार्गावर वाहनाच्या लांब रंगा लागल्याने वाहतूक कोंडी निर्माण झाली आहे.

बंगळूर, धारवाड येथे कोरोना (Covid) रुग्ण सापडल्याने बेळगाव जिल्ह्यातील कर्नाटक सीमा तपासणी नाक्यावर बंदोबस्त कडक करण्यात आला असून आरटीपीसीआर अहवाल असणाऱ्या प्रवाशांनाच कर्नाटकात प्रवेश दिला जात आहे. दरम्यान सीमेलगत असणाऱ्या महाराष्ट्रातील गडहिंग्लज, आजरा, उत्तूर, चंदगड याठिकाणच्या प्रवाशांचे ओळखपत्र बघून मगच पुढे सोडले जात आहे.

गेल्या महिन्याभरापासून या ठिकाणी तपासणी बंद करण्यात आली होती परंतु अचानक तपासणी सुरू झाल्याने नागरिकांची तारांबळ उडाली असून राष्ट्रीय महामार्गावर वाहनांच्या लांबच लांब रांगा लागल्या आहेत. सीमा तपासणी नाक्यावर आरोग्य, महसूल व पोलिस विभागाने बंदोबस्त ठेवला आहे.

निपाणी मंडल पोलिस निरीक्षक एस. व्ही. शिवयोगी, निपाणी ग्रामीण पोलिस ठाण्याचे उपनिरीक्षक अनिल कुंभार यांच्या मार्गदर्शनाखाली सहाय्यक उपनिरीक्षक एस. ए. टोलगी, एम. एस. सूर्यवंशी व पोलिसांनी चोख पोलिस बंदोबस्त ठेवला आहे.