Aryan Khan Case: आर्यन खान प्रकरणात नार्कोटिक्स कंट्रोल ब्युरोने (NCB) दोन अधिकाऱ्यांना निलंबित केले आहे. मिळालेल्या माहितीनुसार, आर्यन प्रकरणाशी संबंधित मुख्य तपास अधिकारी, अधीक्षक व्हीव्ही सिंह आणि गुप्तचर अधिकारी आशिष रंजन प्रसाद यांना तात्काळ निलंबित करण्यात आले आहे. कामात हलगर्जीपणा आणि अनियमितता झाल्यामुळे ही कारवाई करण्यात आली आहे.

दरम्यान, क्रूझ ड्रग्स प्रकरणात एनसीबीने आर्यन खानसह (Aryan Khan) अन्य 19 जणांना आरोपी केले होते. आर्यनला एनसीबीने 3 ऑक्टोबर रोजी मुंबईच्या किनारी भागात एका क्रूझ जहाजातून अटक केली होती. मात्र, नंतर मुंबई उच्च न्यायालयाने (Mumbai High Court) त्याची जामिनावर सुटका केली. गेल्या वर्षी नोव्हेंबरमध्ये आर्यनला जामीन देण्याचे आदेश जारी करताना उच्च न्यायालयाने आर्यन खान, अरबाज मर्चंट आणि मुनमुन धमेचा यांचा अंमली पदार्थांशी संबंधित गुन्ह्यांमध्ये हातमिळवणी केली असल्याचे म्हटले होते. मात्र यामध्ये कोणताही कटाचा पुरावा नाही. त्यांच्यात व्हॉट्सअ‍ॅपवरील चॅटमध्ये काहीही आक्षेपार्ह आढळले नाही, असेही न्यायालयाने म्हटले होते.

तसेच, "केवळ आर्यन खान, अरबाज मर्चंट आणि मुनमुन धमेचा एकाच क्रूझमधून प्रवास करत असल्याने, हेच त्यांच्याविरुद्ध कट रचल्याचा आरोप होण्याचे कारण असू शकत नाही," असे निरीक्षण न्यायालयाने नोंदवले.