शिवेसेना नेते संजय राऊत यांना मोठा झटका देणारा निर्णय शिवडी कोर्टाने दिला आहे. संजय राऊत यांच्या विरोधात शिवडी कोर्टाने जामीनपत्र अटक वॉरंट जारी केलं आहे. मेधा सोमय्या यांच्या युवक प्रतिष्ठानने शौचालय बांधण्याचं कंत्राट घेतले होते. यावरुन शिवसेना नेते संजय राऊत यांनी किरीट सोमय्या यांच्या पत्नी मेधा सोमय्या यांच्यावर भ्रष्टाचाराचा आरोप केला होता. या प्रकरणात न्यायालयाने हे वॉरंट बजावलं आहे. (Arrest warrant issued against sanjay raut by sewree court complaint filed by Medha kirit somaiya)

मिळालेल्या माहितीनूसार मीरा भाईंदर शहरात 154 सार्वजनिक शौचालय बांधण्यात आले होते. त्यापैकी 16 शौचालये बांधण्याचं कंत्राट सोमय्या यांच्या पत्नी मेधा सोमय्या यांच्या युवक प्रतिष्ठानला मिळाल्याचा दावा राऊत यांनी केला होता. यावेळी शिवसेना नेते संजय राऊत यांनी किरीट सोमय्या आणि मेधा सोमय्या यांच्यावर भ्रष्टाचाराचा गंभीर आरोप केला होता.

यावरुन किरीट सोम्मया मेधा सोमय्या यांनी संजय राऊतांच्या विरोधात मानहानीचा दावा ठोकला होता. त्यानंतर शिवडी कोर्टाकडून राऊत यांना कोर्टात हजर राहण्याचे समन्स बजावण्यात आले होते. पण राऊत कोर्टात हजर न राहिल्याने त्यांच्याविरोधात जामीनपत्र अटक वॉरंट जारी करण्यात आलं आहे.