भारतीय क्रिकेट वर्तुळातून एक मोठी बातमी समोर येत आहे. टीम इंडियाचा माजी वेगवान गोलंदाज आणि २०११ च्या विश्वचषक विजयाचा नायक झहीर खान पुन्हा एकदा भारतीय जर्सीमध्ये दिसण्याची शक्यता आहे. बीसीसीआयने आगामी काळातील वेगवान गोलंदाजांची फौज तयार करण्यासाठी झहीर खानकडे महत्त्वाची जबाबदारी सोपवण्याची तयारी सुरू केली आहे.

बेंगळुरूच्या 'सेंटर ऑफ एक्सलन्स'मध्ये जहीरची एन्ट्री

मिळालेल्या माहितीनुसार, झहीर खान मार्चच्या पहिल्या आठवड्यात बेंगळुरू येथील 'सेंटर ऑफ एक्सलन्स' (CoE) मध्ये एका विशेष प्रशिक्षण शिबिराचे नेतृत्व करणार आहे. बीसीसीआयने ९ फेब्रुवारी रोजी वेगवान गोलंदाजी प्रशिक्षकासाठी अर्ज मागवले होते. ट्रॉय कूली यांचा कार्यकाळ संपल्यानंतर हे पद रिक्त झाले होते. जहीर खानचा दांडगा अनुभव पाहता, बोर्ड त्याला ही जबाबदारी देऊन युवा गोलंदाजांना पैलू पाडण्याचे काम सोपवू इच्छिते.

कोचिंगसाठी झहीर खान सज्ज; आयपीएलचा अनुभव कामी येणार

झहीर खान केवळ अनुभवी खेळाडूच नाही, तर त्याला प्रशिक्षणाचाही मोठा अनुभव आहे. त्याने यापूर्वी आयपीएलमध्ये मुंबई इंडियन्स, दिल्ली कॅपिटल्स आणि लखनऊ सुपर जायंट्स यांसारख्या संघांसोबत मार्गदर्शक (मेंटॉर) आणि प्रशिक्षक म्हणून काम केले आहे. जहीर स्वतः भारतीय गोलंदाजीची धुरा सांभाळण्यासाठी आणि पुढच्या पिढीला मार्गदर्शन करण्यासाठी अत्यंत उत्सुक असल्याचे समजते. त्याच्या येण्याने भारतीय वेगवान गोलंदाजीला नवी धार मिळण्याची शक्यता आहे.

सध्या दक्षिण आफ्रिकेचा माजी खेळाडू मॉर्नी मॉर्कल भारतीय संघाचा गोलंदाजी प्रशिक्षक आहे. मॉर्कल आणि मुख्य प्रशिक्षक गौतम गंभीर यांच्यात मैत्रीचे घट्ट नाते आहे, परंतु झहीर खानच्या एन्ट्रीमुळे समीकरणे बदलू शकतात. ज्याप्रमाणे राहुल द्रविड यांनी प्रथम एनसीएमध्ये (आताचे CoE) काम करून नंतर मुख्य प्रशिक्षकपद स्वीकारले होते, त्याच मार्गावरून झहीर खान भारतीय संघाचा मुख्य गोलंदाजी प्रशिक्षक बनू शकतो.