IPL 2026 Points Table : राजस्थानला नमवून SRH चा गुणतालिकेत धमाका! मोठ्या उलटफेरासह टॉप-5 मध्ये एन्ट्री; मुंबई, चेन्नई आणि कोलकाताची अवस्था बिकट

SRH Jumps to 4th Place in IPL Points Table: आयपीएल 2026 च्या रोमांचक प्रवासात 13 एप्रिल रोजी खेळल्या गेलेल्या सामन्यात सनरायझर्स हैदराबादने राजस्थान रॉयल्सचा 57 धावांनी धुव्वा उडवला. हैदराबादचा या हंगामातील हा दुसरा विजय असून या विजयामुळे त्यांनी गुणतालिकेत जबरदस्त झेप घेतली. एकीकडे हैदराबादने विजयाचा जल्लोष साजरा केला असला, तरी दुसरीकडे या पराभवानंतरही राजस्थान रॉयल्सचे गुणतालिकेतील अव्वल स्थान अबाधित आहे. हैदराबादच्या या विजयामुळे मात्र गुणतालिकेतील गणित पूर्णपणे बदलले असून सातव्या क्रमांकावर असलेला हा संघ थेट चौथ्या स्थानी पोहोचला.

या विजयानंतर गुणतालिकेवर नजर टाकली असता, राजस्थान रॉयल्स 8 गुणांसह अजूनही पहिल्या क्रमांकावर विराजमान आहे. दुसऱ्या स्थानी पंजाब किंग्स असून त्यांच्या खात्यात 7 गुण आहेत. रॉयल चॅलेंजर्स बंगळुरु 6 गुणांसह तिसऱ्या स्थानी आहे. सनरायझर्स हैदराबादने या विजयानंतर तब्बल तीन पायऱ्यांची प्रगती करत 4 गुणांसह चौथे स्थान पटकावले. हैदराबादच्या या एन्ट्रीमुळे दिल्ली कॅपिटल्सची एका स्थानाने घसरण झाली असून ते 4 गुणांसह पाचव्या क्रमांकावर आहेत. गुजरात टायटन्स आणि लखनऊ सुपर जायंट्स या दोन्ही संघांकडे प्रत्येकी 4 गुण असून ते अनुक्रमे सहाव्या आणि सातव्या क्रमांकावर आहेत.

दुसरीकडे, दिग्गज संघांची अवस्था या हंगामात काहीशी चिंताजनक दिसत आहे. पाच वेळा विजेतेपद पटकावणारा मुंबई इंडियन्सचा संघ 2 गुणांसह आठव्या स्थानावर आहे, तर चेन्नई सुपर किंग्सचे देखील 2 गुण असून ते नवव्या स्थानावर आहेत. कोलकाता नाईट रायडर्सचा संघ 1 गुणासह गुणतालिकेत सर्वात तळाला म्हणजेच दहाव्या क्रमांकावर आहे. हैदराबादने मिळवलेला हा विजय केवळ दोन गुणांपुरता मर्यादित नसून त्यांनी मोठ्या फरकाने सामना जिंकल्यामुळे त्यांच्या नेट रनरेटमध्येही चांगली सुधारणा झाली आहे.

राजस्थान रॉयल्ससाठी (Rajasthan Royals) हा पराभव मोठा असला तरी, त्यांनी सुरुवातीच्या सामन्यांमध्ये मिळवलेल्या विजयांमुळे त्यांचे पहिले स्थान तूर्तास सुरक्षित राहिले आहे. आगामी सामन्यांमध्ये खालच्या क्रमांकावर असलेल्या संघांना आता विजयासाठी अधिक जोर लावावा लागणार असल्याचे स्पष्ट झाले आहे.