Wrestlers Protest: देशातील अव्वल कुस्तीपटू गेल्या महिन्यापासून डब्ल्यूएफआयचे प्रमुख ब्रिजभूषण शरण सिंह यांच्याविरोधात आंदोलन करत आहेत. कुस्तीपटूंनी त्यांच्यावर लैंगिक छळाचे आरोप केले आहेत. गेल्या आठवड्यात जंतरमंतर येथून कुस्तीपटूंना हटवण्यात आले.

आता सर्वात मोठी बातमी अशी येत आहे की, भारताचा माजी दिग्गज क्रिकेटपटू सचिन तेंडुलकरच्या घराबाहेर युवक काँग्रेसने पोस्टर लावले आहेत.

त्या पोस्टरवर 'कुस्तीपटूंच्या मुद्द्यावर लक्ष केंद्रित करा' असे लिहिले आहे. मात्र, पोलिसांनी आता हे पोस्टर हटवले.

गंगेत पदके अर्पण करण्याची दिली धमकी

दिल्ली पोलिसांनी (Delhi Police) नुकतेच या कुस्तीपटूंना ताब्यात घेतले होते, परंतु त्यानंतर त्यांना सोडण्यात आले. मात्र, सुटका झाल्यानंतर पैलवानांनी मोठा निर्णय घेतला.

बजरंग पुनिया, साक्षी मलिक यांसारख्या दिग्गज कुस्तीपटूंनी सोशल मीडियावर एक पत्र शेअर केले आहे, ज्यामध्ये त्यांनी लिहिले की, ते आता आपली पदके गंगेत अर्पण करतील.

30 मे रोजी ते हरिद्वारलाही पोहोचले होते. मात्र त्यांना हा निर्णय घेण्यापासून रोखण्यात आले. आपल्या मागण्या पूर्ण करण्यासाठी त्यांनी सरकारला आणखी 5 दिवसांची मुदत दिली आहे.

कुस्तीपटूंना ब्रिजभूषणची अटक हवी आहे

एप्रिल महिन्यापासून बजरंग पुनिया (Bajrang Punia), विनेश फोगट, साक्षी मलिक यांच्यासह अनेक पैलवान आंदोलन करत आहेत. त्यांनी भारतीय कुस्ती महासंघाचे प्रमुख ब्रिजभूषण शरण सिंह यांच्यावर महिला कुस्तीपटूंवर लैंगिक अत्याचार केल्याचा आरोप केला आहे.

ब्रिजभूषण यांच्या विरोधात एफआयआरही नोंदवण्यात आला आहे, मात्र अद्यापपर्यंत त्यांच्याविरोधात कोणतेही ठोस पुरावे मिळालेले नाहीत.