WTC 2023 Final, India vs Australia, Playing XI: बुधवारपासून भारत विरुद्ध ऑस्ट्रेलिया संघात कसोटी चॅम्पियनशीप 2023 स्पर्धेचा अंतिम सामना सुरू होत आहे. इंग्लंडमधील द ओव्हल मैदानावर हा सामना होत आहे. या सामन्यात भारताचा कर्णधार रोहित शर्माने नाणेफेक जिंकून प्रथम गोलंदाजी करण्याचा निर्णय घेतला आहे.

या सामन्यासाठी भारतीय संघाच्या प्लेइंग इलेव्हनमध्ये एक फिरकीपटू आणि चार वेगवान गोलंदाज असे संमिश्रण करण्यात आले आहे. त्यामुळे फिरकी गोलंदाज म्हणून रविंद्र जडेजाला संधी देण्यात आली आहे. तसेच अनुभवी फिरकीपटू आर अश्विनला मात्र या सामन्यासाठी संधी मिळालेली नाही.

याबद्दल रोहितने सांगितले की आर अश्विन सारख्या गोलंदाजाला बाहेर ठेवणे कठीण असते. तो अनेकवर्षे संघासाठी मॅचविनर खेळाडू ठरला आहे. पण परिस्थितीनुसार असे कठीण निर्णय घ्यावे लागतात. त्याचबरोबर या सामन्यातून अजिंक्य रहाणेने पुन्हा एकदा भारताच्या प्लेइंग इलेव्हनमध्ये पुनरागमन केले आहे. रहाणे जवळपास १८ महिन्यांनंतर कसोटी सामना खेळताना दिसणार आहे.

तसेच ऑस्ट्रेलियाच्या संघाने स्कॉट बोलंडला प्लेइंग इलेव्हनमध्ये संधी दिली आहे. ऑस्ट्रलियाचा वेगवान गोलंदाज जोश हेजलवूड दुखापतीमुळे बाहेर झाला आहे. त्यामुळे त्याच्याऐवजी प्लेइंग इलेव्हनमध्ये ऑस्ट्रेलियाने बोलंडला खेळवण्याचा निर्णय घेतला.

दरम्यान, कसोटी चॅम्पियनशीपचा अंतिम सामना खेळण्याची भारताची दुसरी वेळ आहे. यापूर्वी 2019-21 दरम्यान कसोटी चॅम्पियनशीपचे पहिले पर्व खेळवण्यात आले होते, त्या पर्वातही भारताने अंतिम सामन्यात स्थान मिळवले होते. मात्र भारताला अंतिम सामन्यात न्यूझीलंडविरुद्ध 8 विकेट्सने पराभव स्विकारावा लागला होता.

तसेच ऑस्ट्रेलियाची मात्र कसोटी चॅम्पियनशीपचा अंतिम सामना खेळण्याची ही पहिलीच वेळ आहे.

असे आहेत प्लेइंग इलेव्हन -

• भारत - रोहित शर्मा (कर्णधार), शुभमन गिल, चेतेश्वर पुजारा, विराट कोहली, अजिंक्य रहाणे, श्रीकर भारत (यष्टीरक्षक), रविंद्र जडेजा, शार्दुल ठाकूर, उमेश यादव, मोहम्मद शमी, मोहम्मद सिराज

• ऑस्ट्रेलिया - डेव्हिड वॉर्नर, उस्मान ख्वाजा, मार्नस लॅब्युशेन, स्टीव्ह स्मिथ, ट्रॅविस हेड, कॅमेरॉन ग्रीन, ऍलेक्स कॅरी (यष्टीरक्षक), पॅट कमिन्स (कर्णधार), मिचेल स्टार्क, नॅथन लायन, स्कॉट बोलंड