ICC prepares back-up pitch at The Oval for WTC 2023 Final: भारत विरुद्ध ऑस्ट्रेलिया संघात बुधवारपासून (7 जून) कसोटी चॅम्पियनशीप 2021-23 स्पर्धेतील अंतिम सामना सुरू होत आहे. हा सामना दक्षिण लंडनमधील द ओव्हल मैदानावर खेळवला जाणार आहे. या सामन्यासाठी दोन्ही संघ, तसेच आंतरराष्ट्रीय क्रिकेट परिषदेनेही जोरदार तयारी केली आहे.
दरम्यान, या सामन्यासाठी आयसीसीने द ओव्हलवर मुख्य खेळपट्टी आणि एक पर्यायी खेळपट्टीही तयार केलेली आहेत. सध्या इंग्लंडमध्ये जस्ट स्टॉप ऑईलकडून आंदोलन केले जात आहे. ब्रिटीश सरकारने नवीन तेल, वायू आणि कोळसा प्रकल्पांसाठी सर्व परवाने रद्द करावीत अशी मागणी आंदोलनकर्त्यांकडून करण्यात येत आहे.
यापूर्वी आंदोलकांनी जूनच्या पहिल्या आठवड्यात इंग्लंड क्रिकेट संघाच्या बसलाही थांबवून ठेवले होते. इंग्लंड आणि आयर्लंड संघात जूनच्या पहिल्या आठवड्यात लॉर्ड्सवर एकमेव कसोटी सामना झाला होता.
यावेळी इंग्लंड संघाच्या बसला स्टेडियमवर जात असताना रस्त्यात आंदोलन सुरू असल्याने उशीर झाला होता. याबद्दल जॉनी बेअरस्टोने सोशल मीडियावर फोटोही शेअर केला होता.
दरम्यान, याच आंदोलनाच्या भीतीने आयसीसीने दोन खेळपट्ट्या तयार ठेवल्या आहेत. कारण वाईटातील वाईट परिस्थितीत जर आंदोलकांनी कसोटी चॅम्पियनशीपच्या अंतिम सामन्यात अडथळा आणला आणि मुख्य खेळपट्टी उघडली, तर दुसरी खेळपट्टी तयार असावी असा यामागील उद्देश आहे. तसेच या सामन्यासाठी कडेकोट सुरक्षा व्यवस्थाही करण्यात आली आहे.
भारत विरुद्ध ऑस्ट्रेलिया यांच्यातील कसोटी चॅम्पियनशीपचा अंतिम सामना 7 ते 11 जून दरम्यान होणार असून 12 जून हा राखीव दिवस आहे.
भारतीय संघ - रोहित शर्मा (कर्णधार), शुभमन गिल, चेतेश्वर पुजारा, विराट कोहली, अजिंक्य रहाणे, केएस भरत (यष्टीरक्षक), रविचंद्रन अश्विन, रवींद्र जडेजा, अक्षर पटेल, शार्दुल ठाकूर, मोहम्मद शमी, मोहम्मद सिराज, उमेश यादव, जयदेव उनाडकट, इशान किशन (यष्टीरक्षक).
राखीव खेळाडू - यशस्वी जयस्वाल, मुकेश कुमार आणि सुर्यकुमार यादव
ऑस्ट्रेलिया संघ - पॅट कमिन्स (कर्णधार), स्कॉट बोलंड, ऍलेक्स कॅरी (यष्टीरक्षक), कॅमेरॉन ग्रीन, मार्कस हॅरिस, ट्रॅव्हिस हेड, जोश इंग्लिस (यष्टीरक्षक), उस्मान ख्वाजा, मार्नस लॅब्युशेन, नॅथन लायन, टॉड मर्फी, मायकेल नेसर, स्टीव्ह स्मिथ (उपकर्णधार), मिचेल स्टार्क, डेव्हिड वॉर्नर
राखीव खेळाडू: मिचेल मार्श, मॅथ्यू रेनशॉ
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.
दैनिक गोमन्तक आता सर्व सोशल मीडिया प्लॅटफॉर्मवर. ताज्या घडामोडींसाठी फेसबुक, इन्स्टाग्राम, ट्विटर, शेअर चॅट आणि टेलिग्राम आम्हाला फॉलो करा. तसेच, दैनिक गोमन्तकच्या यूट्यूब चॅनेलला आजच सबस्क्राइब करा.
