Delhi High Court: दिल्ली उच्च न्यायालयाने शनिवारी कुस्तीपटू विनेश फोगट आणि बजरंग पुनिया यांना मोठा दिलासा दिला आहे. आशियाई क्रीडा स्पर्धेसाठीच्या ट्रायलमधून देण्यात आलेल्या सूटमध्ये हस्तक्षेप करण्यास न्यायालयाने नकार दिला आहे.

न्यायमूर्ती सुब्रमण्यम प्रसाद यांनी फोगट आणि पुनिया यांनी आशियाई क्रीडा स्पर्धेत थेट प्रवेशाविरोधात दाखल केलेली याचिका फेटाळून लावली.

अंडर-20 विश्वविजेता अन्विल पंघल आणि अंडर-23 आशियाई चॅम्पियन सुजित कलकल यांनी ही याचिका दाखल केली होती. न्यायाधीश म्हणाले की, "रिट याचिका फेटाळली आहे."

इतर पैलवानांनी विरोध दर्शवला

दरम्यान, भारतीय ऑलिम्पिक संघटनेच्या तदर्थ समितीने मंगळवारी विनेशला 53 किलो आणि पुनियाला 65 किलोमध्ये थेट आशियाई क्रीडा स्पर्धेत प्रवेश दिला, तर इतर कुस्तीपटूंना भारतीय संघात स्थान मिळवण्यासाठी 22 आणि 23 जुलै रोजी होणाऱ्या ट्रायलमधून जावे लागेल.

पंघल आणि कलकल यांनी 19 जुलै रोजी उच्च न्यायालयात (High Court) या सूटला आव्हान दिले होते. या स्पर्धेसाठी योग्य निवड प्रक्रिया व्हावी, अशी मागणी त्यांनी केली होती.

आदेश रद्द करण्याची मागणी

हृषिकेश बरुआ आणि अक्षय कुमार या वकिलांनी दाखल केलेल्या याचिकेत IOA तदर्थ समितीने दोन श्रेणी (पुरुष फ्रीस्टाइल 65 किलो आणि महिला 53 किलो) संदर्भात जारी केलेले निर्देश बाजूला ठेवण्याची मागणी केली होती. तसेच फोगट आणि पुनिया यांना दिलेली सूटही रद्द करण्यात यावी. मात्र, उच्च न्यायालयाने ही याचिका फेटाळून लावली.