Ricky Ponting Meets Virat Kohli: इंडियन प्रीमियर लीग म्हणजेच आयपीएलमध्ये भारताबरोबरच अनेक परदेशी खेळाडूही खेळताना दिसतात. त्यामुळे विविध देशांतील खेळाडूंमध्ये झालेली मैत्रीही पाहायला मिळते. तसेच अनेक खेळाडू एकमेकांशी बोलून चर्चा करताना दिसतात. नुकताच असाच एक व्हिडिओ समोर आला असून ज्यात रिकी पाँटिंग आणि विराट कोहली चर्चा करताना दिसत आहेत.

शनिवारी रॉयल चॅलेंजर्स बेंगलोर विरुद्ध दिल्ली कॅपिटल्स संघात एम चिन्नास्वामी स्टेडियमवर सामना होणार आहे. या सामन्याआधी विराट आणि पाँटिंग भेटले आहेत. पाँटिंग दिल्ली संघाचा मुख्य प्रशिक्षक आहे, तर विराट आरसीबीचा प्रमुख फलंदाज आहे.

दिल्ली कॅपिटल्सने सोशल मीडियावर विराट आणि पाँटिंग यांच्या भेटीदरम्यानचा व्हिडिओ शेअर केला आहे. त्यांच्या भेटीदरम्यान पाँटिंगचा मुलगा फ्लेचर देखील उपस्थित होता. या व्हिडिओला कॅप्शन दिले आहे की 'जेव्हा रिकी कोहलीला भेटतो. एक्सटेंडेड केमियो - रिकी ज्यूनियर'.

या व्हिडिओमध्ये दिसते की पाँटिंग त्याच्या मुलाची विराटशी ओळख करून देत आहे. त्यावेळी विराट सांगतो की तो त्याला बाहेर भेटला आहे. त्यानंतर पाँटिंग आणि विराट हलकी फुलकी चर्चा करताना दिसतात. यावेळी फ्लेचरही पाँटिंगच्याच्या शेजारी उभा असलेला दिसतो.

पाँटिंग आणि विराटच्या भेटीच्या या व्हिडिओला चाहत्यांनी चांगली पसंती दाखवली असून लाखो लोकांनी इंस्टाग्रामवर लाईक्स दिले आहेत. तसेच या व्हिडिओवर अनेक प्रतिक्रियाही आल्या आहेत.

दरम्यान, विराट आणि पाँटिंग दिग्गज खेळाडूंपैकी एक गणले जातात. काही महिन्यांपूर्वीच विराटने पाँटिंगच्या आंतरराष्ट्रीय क्रिकेटमध्ये सर्वाधिक शतकांचा विक्रम मागे टाकला आहे. पाँटिंगने 71 शतके केली आहेत, तर विराटने 75 शतके केली आहेत. या यादीत विराट आणि पाँटिंगच्या पुढे अव्वल क्रमांकावर 100 शतकांसह सचिन तेंडुलकर आहे.

दिल्लीला पहिल्या विजयाची प्रतिक्षा

दरम्यान, आयपीएल 2023 बद्दल बोलायचे झाल्यास दिल्ली कॅपिटल्सने आत्तापर्यंत चार सामने खेळले असून एकाही सामन्यात अद्याप त्यांना विजय मिळवता आलेला नाही. तसेच आरसीबीने तीन सामने खेळले असून त्यांनी पहिला सामना जिंकला होता, मात्र त्यांनतरच्या दोन्ही सामन्यात त्यांना पराभवाचा सामना करावा लागला आहे.