Yashasvi Jaiswal gets emotional after 1st Test Century:

भारत विरुद्ध वेस्ट इंडिज संघात बुधवारपासून दोन सामन्यांच्या कसोटी मालिकेतील पहिला सामना डॉमिनिकामधील रोसौ येथील विंडसर पार्क येथे खेळला जात आहे. हा 21 वर्षीय जयस्वालचा पहिलाच कसोटी सामना असून त्याने हा सामना खास बनवला आहे. पहिल्या सामन्यात त्याने शतकी खेळी केली. त्यामुळे तो हे शतक झळकावल्यानंतर खूपच भावुक झाला होता.

जयस्वालने त्याचे आंतरराष्ट्रीय पदार्पणातील शतक त्याच्या आई-वडिलांना समर्पित केले आहे. त्याने भारताच्या पहिल्या डावात 215 चेंडूत शतक केले. त्याने सांगितले की हे शतक त्याच्यासाठी आणि कुटुंबासाठी खुप खास होता.

जयस्वालने पहिल्या डावात कर्णधार रोहित शर्माबरोबर सलामीला 229 धावांची विक्रमी भागीदारीही केली. वेस्ट इंडिजविरुद्धची ही कसोटीतील भारतीय सलामीवीरांनी केलेली सर्वात मोठी भागीदारी ठरली.

दरम्यान, रोहितने देखील 103 धावांची खेळी केली. तो बाद झाल्यानंतर शुभमन गिलही 6 धावांवर लगेचच बाद झाला. पण नंतर जयस्वालला विराट कोहलीने चांगली साथ दिली. जयस्वालने संपूर्ण दुसऱ्या दिवशी फलंदाजी केली. तो दुसऱ्या दिवसाखेरनंतरही नाबाद राहिला.

दुसऱ्या दिवसाखेर जयस्वाल 350 चेंडूत 143 धावांवर नाबाद आहे. त्याच्याबरोबर विराट कोहली 36 धावांवर नाबाद आहे. जयस्वाल आणि विराट यांच्यात दुसऱ्या दिवसाखेर 72 धावांची नाबाद भागीदारी झाली आहे.

तसेच भारताने दुसऱ्या दिवसाखेर पहिल्या डावात 113 षटकात 2 बाद 312 धावा केल्या असून भारतीय संघ 162 धावांनी आघाडीवर आहे. आता तिसऱ्या दिवशी जयस्वालला द्विशतकाची संधी आहे. जर त्याने द्विशतक केले, तर तो पदार्पणाच्या कसोटीत द्विशतक करणारा पहिलाच भारतीय क्रिकेटपटू ठरेल.

दरम्यान, वेस्ट इंडिजचा पहिला डाव 64.3 षटकात 150 धावांवर संपुष्टात आला होता.