पणजी: बंगळूरमधील अवेळचा पाऊस शनिवारी गोव्याच्या मदतीस आला. विजय हजारे करंडक एकदिवसीय क्रिकेट सामन्यात आंध्रचा संघ वर्चस्व राखू पाहत असताना पावसामुळे सामना रद्द करावा लागला.

(Vijay Hazare Trophy Andhra Pradesh vs Goa cricket match canceled)

पावसामुळे खेळ थांबला तेव्हा आंध्रने 21 षटकांत 1 बाद 96 धावा केल्या होत्या, नंतर खेळ पुन्हा सुरु होऊ शकला नाही व दोन्ही संघांना प्रत्येकी दोन गुण विभागून देण्यात आले. हा सामना रद्द झाल्याने गोव्याचा संघ रविवारी बिहारविरुद्ध खेळेल.

आंध्रला अभिषेक रेड्डी व अश्विन हेब्बर यांनी 43 धावांची सलामी दिली. दहाव्या षटकात फेलिक्स आलेमावने अभिषेकला यष्टिरक्षक एकनाथ केरकर याच्याकरवी झेलबाद केले. त्यानंतर अश्विन व कर्णधार के. एस. भारत यांनी दुसऱ्या विकेटसाठी 53 धावांची अभेद्य भागीदारी केली.

संक्षिप्त धावफलक : आंध्र : 21 षटकांत 1 बाद 96 (अभिषेक रेड्डी 21, अश्विन हेब्बर नाबाद 42, के. एस. भारत नाबाद 33, लक्षय गर्ग 5-0-10-0, अर्जुन तेंडुलकर 3-0-15-0, फेलिक्स आलेमाव 5-1-16-1, सुयश प्रभुदेसाई 2-0-19-0, दीपराज गावकर 3-0-16-0, मोहित रेडकर 2-0-14-0, दर्शन मिसाळ 1-0-6-0).