पणजी : राष्ट्रीय काईट सर्फिंग स्पर्धेत गतविजेत्या वरुण नारायणन याने चार शर्यती जिंकून दबदबा राखला, तसेच स्पर्धेत पदार्पण करणारी गोव्याची किओना रजनी हिनेही उल्लेखनीय सर्फिंग करून छाप पाडली. स्पर्धा मांद्रे (Mandrem) समुद्रकिनारी सुरू आहे.

वाऱ्याचा वेग कमी असल्यामुळे रविवारी एकही शर्यत होऊ शकली नव्हती. सोमवारी वाऱ्याच्या 12 ते 15 नॉट्स वेगामुळे सहभागी सर्फर्स उत्साहित झाले.

स्पर्धेच्या अ गटात वरुण नारायणन सध्या अव्वल स्थानी असून गोव्यातील (goa) अनुभवी सर्फर फिलिप डार्टनेल दुसऱ्या क्रमांकावर आहे. या गटात अविश्मा मट्टा तिसऱ्या स्थानी आहे.

किओना स्पर्धेतील सर्वांत युवा सर्फर आहे. सोमवारी तिने कमाल केली. ब गटात तिने अनुभवी स्पर्धकांना मागे टाकत चारपैकी तीन शर्यती जिंकल्या. अन्य एका शर्यतीत अर्जुन मोठा याने पहिला क्रमांक मिळवला. किओनाने अर्जुनसह डेरिक मिनेझिस, युली, कबीर या अनुभवींना मागे टाकले.