FIH Hockey Women’s Junior World Cup 2023, Team India knocked out:

चिलीला महिला ज्युनियर हॉकी वर्ल्डकप २०२३ स्पर्धा सुरू आहे. या स्पर्धेत भारतीय संघाचा साखळी फेरीसाठी सी गटात समावेश आहे. या गटातील भारताचा तिसरा सामना बेल्जियमविरुद्ध पार पडला. सँटिआगो, चिली येथे झालेल्या या सामन्यात बेल्जियमने भारताला 3-2 अशा फरकाने पराभूत केले.

दरम्यान, भारताचा हा सलग दुसरा पराभव ठरला. यापूर्वी दुसऱ्या सामन्यात जर्मनीने भारताला 4-3 अशा फरकाने पराभूत केले होते.

पहिल्या सामन्यात मात्र भारताने कॅनडाविरुद्ध 12-0 असा विजय मिळवलेला. मात्र सलग दोन सामन्यातील पराभवामुळे भारतीय संघ सी गटात तिसऱ्या क्रमांकावर राहिला, त्यामुळे भारताचे उपांत्य पूर्व फेरीत पोहचण्याचे स्वप्न भंगले. आता भारतीय संघ 9 ते 16 क्रमांकांमध्ये स्थान मिळवण्यासाठी न्यूझीलंडविरुद्ध 5 डिसेंबर रोजी खेळेल.

शनिवारी (2 डिसेंबर) बेल्जियमविरुद्ध झालेल्या सामन्याबद्दल सांगायचे झाले, तर भारताकडून अन्नूने भारतासाठी दोन्ही गोल नोंदवले, तर बेल्जियमकडून नोआ श्क्रुअर्स, फ्रान्स दे मॉट आणि अस्त्रिद बोनामी यांनी प्रत्येकी एक गोल केला.

नोआने पहिल्याच क्वार्टरमध्ये पाचव्या मिनिटाला बेल्जियमसाठी पहिला गोल नोंदवला होता. त्यानंतर दुसऱ्या क्वार्टरमध्ये एकही गोल झाला नाही, पण तिसऱ्या क्वार्टरमध्ये फ्रान्स दे मॉटने 42 व्या मिनिटाला बेल्जियमला दुसरा गोल करून दिला.

तसेच तिसऱ्या क्वार्टरमध्ये अन्नूने भारताला पुनरागमन करून देण्याचा प्रयत्न केला होता. तिने 47 आणि 51 व्या मिनिटाला गोल नोंदवले आणि भारताला बरोबरी साधून दिली होती. मात्र, बोनामीने 52 व्या मिनिटाला बेल्जियमला तिसरा गोल करून दिला. हा गोल बेल्जियमच्या विजयासाठी महत्त्वाचाही ठरला.