Team India: नवीन वर्षाच्या सुरुवातीलाच 3 जानेवारीपासून भारताला श्रीलंकेविरुद्ध 3 टी20 आणि 3 वनडे सामन्यांची मालिका खेळायची आहे. या मालिकेसाठी मंगळवारी भारतीय संघाची घोषणा केली जाण्याची शक्यता आहे. दरम्यान, बीसीसीआयने अद्याप नवीन निवड समीतीची घोषणा केलेली नाही. त्यामुळे जुनीच निवड समीती भारतीय संघाची निवड करण्याची शक्यता आहे.

दरम्यान, अशी चर्चा आहे की केएल राहुल त्याच्या लग्नाच्या कारणाने या मालिकांमध्ये खेळणार नाही. तसेच रोहित शर्मा अद्याप त्याच्या अंगठ्याच्या दुखापतीतून सावरत असल्याने टी20 मालिकेत खेळणार नाही. अशा परिस्थितीत टी20 मालिकेसाठी हार्दिक पंड्याकडे भारतीय संघाचे कर्णधारपद सोपवले जाण्याची शक्यता आहे.

तसेच टी20 संघात काही युवा खेळाडूंनाही संधी दिली जाऊ शकते, तर ऋषभ पंत आणि भुवनेश्वर कुमारला विश्रांती दिली जाऊ शकते. त्यामुळे या मालिकेत राहुल त्रिपाठी, ऋतुराज गायकवाड, संजू सॅमसन या खेळाडूंना संधी दिली जाण्याची शक्यता आहे. तसेच हे देखील पाहावे लागेल की रविंद्र जडेजा आणि जसप्रीत बुमराह हे खेळाडू पूर्ण तंदुरुस्त आहेत की नाही.

दरम्यान, टी20 संघात गोलंदाजी फळीत युजवेंद्र चहल, कुलदीप यादव, अर्शदीप सिंग, उमरान मलिक, मोहम्मद सिराज यांना संधी मिळण्याची शक्यता आहे.

वनडे मालिकेबद्दल बोलायचे झाल्यास कर्णधार रोहित शर्माचे या मालिकेतून भारतीय संघात पुनरागमन होऊ शकते. तसेच केएल राहुल नसल्याने शुभमन गिलचाही संघात समावेश केला जाऊ शकतो. त्याचबरोबर वनडेतील नियमित सदस्य शिखर धवनलाही संधी मिळू शकते.

त्याचबरोबर विराट कोहली, श्रेयस अय्यर, सूर्यकुमार यादव यांना दोन्ही मालिकांसाठी भारतीय संघात संधी दिली जाऊ शकते. तसेच गोलंदाजी फळीत दीपक चाहर आणि शार्दुल ठाकूरही दिसू शकतात.

भारत विरुद्ध श्रीलंका वेळापत्रक -

आंतरराष्ट्रीय टी20 मालिका

3 जानेवारी - पहिला टी20 सामना, मुंबई

5 जानेवारी - दुसरा टी20 सामना, पुणे

7 जानेवारी - तिसरा टी20 सामना, राजकोट

वनडे मालिका

10 जानेवारी - पहिला वनडे, गुवाहाटी

12 जानेवारी - दुसरा वनडे, कोलकाता

15 जानेवारी - तिसरा वनडे, तिरुअनंतपुरम