Afghanistan: अफगाणिस्तानात सत्ता मिळाल्यापासून तालिबान महिलांवर विविध निर्बंध लादत आहे. तालिबान सरकारने महिलांना विद्यापीठांमध्ये जाण्यास बंदी घातली आहे. दरम्यान, तालिबानच्या या निर्णयाविरोधात गुरुवारी काबूलमध्ये दोन डझन महिलांनी निदर्शने केली. आता तुर्की आणि सौदी अरेबियाने या प्रकरणी तालिबान सरकारच्या निर्णयाला विरोध केला आहे.

दरम्यान, अफगाणिस्तानच्या (Afghanistan) अनेक क्रिकेटपटूंनीही विद्यापीठात महिलांना बंदी घालण्याच्या निर्णयाचा निषेध केला आहे. अफगाणिस्तानमध्ये क्रिकेट हा अतिशय लोकप्रिय खेळ असून सोशल मीडियावर खेळाडूंचे लाखो फॉलोअर्स आहेत. तालिबान प्रशासनाने या आठवड्याच्या सुरुवातीला देशभरातील महिलांना खाजगी आणि सार्वजनिक विद्यापीठांमध्ये तत्काळ प्रभावाने आणि पुढील सूचना मिळेपर्यंत उपस्थित राहण्यास मनाई करण्याचे आदेश दिले.

तसेच, तालिबान (Taliban) प्रशासनाने अद्याप या बंदीबाबत सार्वजनिकरित्या काही बोलले नाही किंवा त्याविरोधातील जागतिक प्रतिक्रियांना प्रतिसाद दिला नाही, तर उच्च शिक्षण मंत्रालयाचे प्रवक्ते झियाउल्लाह हाश्मी यांनी गुरुवारी एका ट्विटमध्ये सांगितले की, या आठवड्यात एक पत्रकार परिषद आयोजित केली जाईल.

दुसरीकडे, ऑगस्ट 2021 मध्ये सत्ता काबीज केल्यापासून तालिबानने इस्लामिक कायद्याची अंमलबजावणी करण्यास लागू केले. त्यांनी मिडल स्कूल आणि हायस्कूलमधील मुलींवर बंदी घातली आहे. महिलांना पार्क आणि जिममध्ये जाण्यासही बंदी आहे. विद्यापीठ बंदीचा निषेध तुर्की आणि सौदी अरेबियापासून सुरु झाला आहे. तुर्कीचे परराष्ट्र मंत्री मेव्हलुत कावुसोग्लू यांनी गुरुवारी सांगितले की, बंदी इस्लामिक किंवा मानवतावादी नाही. आपल्या येमेनी समकक्षासह संयुक्त पत्रकार परिषदेत बोलताना, कावुसोग्लू यांनी तालिबानला त्यांचा निर्णय मागे घेण्याचे आवाहन केले.