Sunrisers Eastern Cape won SA20 title for second time:

शनिवारी (10 फेब्रुवारी) साऊथ आफ्रिका20 (SA20) स्पर्धेचा अंतिम सामना पार पडला. सनरायझर्स इस्टर्न केप विरुद्ध डर्बन्स सुपर जायंट्स संघात हा अंतिम सामना पार पडला.

या सामन्यात एडेन मार्करमच्या नेतृत्वातील सनरायझर्स संघाने 89 धावांनी विजय मिळवत विजेतेपदाची ट्रॉफी जिंकली.

सनरायझर्सने मार्करमच्या नेतृत्वात सलग दुसऱ्यांदा ही स्पर्धा जिंकली आहे. गेल्यावर्षी पहिल्यांदा झालेल्या या लीग स्पर्धेचे विजेतेपद देखील मार्करमच्या नेतृत्वातील सनरायझर्सनेच जिंकले होते.

शनिवारी केपटाऊनला झालेल्या अंतिम सामन्यात सनरायझर्सने सुपर जायंट्ससमोर 205 धावांचे लक्ष्य ठेवले होते. या लक्ष्याचा पाठलाग करताना सुपर जायंट्स संघ 17 षटकात 115 धावांवर सर्वबाद झाला.

सुपर जायंट्स संघाकडून विआन मुल्डरने सर्वाझिक 38 धावा केल्या. तसेच ड्वेन प्रिटोरियस (28), मॅथ्यू ब्रिझके (18) आणि ज्युनियर डाला (15) यांनाच दोन आकडी धावसंख्या गाठता आली.

सनरायझर्सकडून गोलंदाजी करताना मार्को यान्सिनने सर्वाधिक 5 विकेट्स घेतल्या. तसेच डॅनिएल वोराल आणि ओटनिल बार्टमन यांनी प्रत्येकी 2 विकेट्स घेतल्या. तसेच सिमन हार्मरने 1 विकेट घेतली.

तत्पुर्वी, सनरायझर्सने प्रथम फलंदाजी करताना 20 षटकात 3 बाद 204 धावा केल्या होत्या. त्यांच्याकडून ट्रिस्टन स्टब्सने सर्वाधिक 56 धावांची नाबाद खेळी केली. 30 चेंडूत केलेल्या या खेळीत त्याने 4 चौकार आणि 3 षटकार मारले.

तसेच टॉम अबेलने 34 चेंडूत 55 धावांची खेळी केली. त्याचबरोबर कर्णधार एडेन मार्करमने 26 चेंडूत नाबाद 42 धावा केल्या, तर सलामीवीर जॉर्डन हर्मननेही 26 चेंडूत 42 धावांची खेळी केली.

सुपर जायंट्सकडून गोलंदाजी करताना कर्णधार केशव महाराजने 2 विकेट्स घेतल्या, तर रिस टोपलीने 1 विकेट घेतली.