पणजी: गतविजेत्या स्पोर्टिंग क्लब द गोवा (Sporting Club The Goa) संघाने माजी विजेत्या चर्चिल ब्रदर्सवर 1-0 फरकाने विजय नोंदवत गोवा प्रोफेशनल लीग फुटबॉल स्पर्धेत अव्वल स्थान प्राप्त केले. सामना शनिवारी म्हापसा येथील धुळेर स्टेडियमवर (Dhuler Stadium) झाला. स्पर्धेत अपराजित असलेल्या स्पोर्टिंगचे आता आठ गुण झाले आहेत. चार सामन्यांत त्यांनी दोन विजय व दोन बरोबरीची नोंद केली आहे. स्पोर्टिंगने आता वास्को स्पोर्टस क्लबवर एका गुणाची आघाडी मिळविली आहे. चर्चिल ब्रदर्सचा (Churchill Brothers) हा स्पर्धेतील पहिला पराभव ठरला. तीन लढतीनंतर त्यांचे चार गुण कायम राहिले आहेत.

उत्तरार्धातील बदली खेळाडू क्लाईव्ह मिरांडा याने पन्नासाव्या मिनिटास जबरदस्त हेडिंग साधत गोल केला, जो स्पोर्टिंग क्लबला एक गुण मिळवून देण्यास पुरेसा ठरला. गिरीश नाईक याच्या पासवर क्लाईव्हचे हेडिंग रोखणे चर्चिल ब्रदर्सचा गोलरक्षक नोरा फर्नांडिस याला शक्य झाले नाही. मागील दोन मोसमात स्पोर्टिंगतर्फे सर्वाधिक गोल करणारा मार्कुस मस्कारेन्हास याला आजच्या लढतीत मुकावे लागले, तरीही गतविजेत्यांनी एकमेव गोलची आघाडी शेवटपर्यंत निसटू दिली नाही. चर्चिल ब्रदर्सने सामन्याच्या पूर्वार्धात वेगवान खेळ केला, पण त्यांना गोल करता आला नाही. चर्चिल ब्रदर्सच्या अफदाल याने स्पोर्टिंगच्या बचावफळीस चांगलेच सतावले. स्पोर्टिंगचा युवा खेळाडू लिस्टन कार्दोझ याने लक्षवेधक खेळ केला, मात्र अननुभवामुळे तो गोल नोंदविण्यात अपयशी ठरला. सामन्याच्या भरपाई वेळेस स्पोर्टिंगचा आघाडीपटू अकेराज मार्टिन्स याला दुखापत झाली, त्यामुळे त्याला मैदान सोडावे लागले.

सेझा-मनोरा सामना आज

गोवा प्रोफेशनल लीग फुटबॉल स्पर्धेत रविवारी सेझा फुटबॉल अकादमी व यूथ क्लब मनोरा यांच्यात सामना होईल. सामना म्हापसा येथील धुळेर स्टेडियमवर होईल. सध्या सेझा अकादमीने दोन बरोबरींसह दोन गुणांची कमाई केली आहे. मनोरा संघाने दोन लढतीतून तीन गुण प्राप्त केले आहेत.