South Africa vs India, 3rd ODI at Paarl, Sanju Samson Century

दक्षिण आफ्रिका विरुद्ध भारत संघात वनडे मालिकेतील तिसरा सामना पार्लला गुरुवारी (२१ डिसेंबर) खेळवला जात आहे. या सामन्यात भारतीय संघाचा फलंदाज संजू सॅमसनने शतक झळकावले आहे.

या सामन्यात दक्षिण आफ्रिकेचा कर्णधार एडेन मार्करमने नाणेफेक जिंकून प्रथम गोलंदाजी करण्याचा निर्णय घेतला होता. त्यामुळे भारताकडून सलामीला साई सुदर्शन (10) आणि रजत पाटीदार (22) यांनी फलंदाजी केली. पण हे दोघे स्वस्तात बाद झाले.

मात्र त्यानंतर संजू सॅमसनने आधी कर्णधार केएल राहुलला (21) आणि मग तिलक वर्माला (52) साथीला घेतले. त्यांच्याबरोबर मोठ्या भागीदारीऱ्या करत भारताची धावसंख्या त्याने 200 पार पोहचवली. त्याने केएल राहुलबरोबर 52 धावांची आणि तिलकबरोबर 116 धावांची भागीदारी केली.

याबरोबरच त्याने 110 चेंडूत त्याचे शतक पूर्ण केले. हे त्याचे आंतरराष्ट्रीय क्रिकेटमधील पहिले शतक ठरले आहे.

सॅमसनने 2015 साली झिम्बाब्वेविरुद्धच्या टी20 सामन्यातून आंतरराष्ट्रीय पदार्पण केले होते. त्यानंतर 2021 साली त्याला वनडेत पदार्पणाची संधी मिळाली.

त्यानंतर त्याने आत्तापर्यंत 24 आंतरराष्ट्रीय टी20 सामने खेळले, तसेच 15 वनडे खेळले. मात्र, त्याला शतक करता आले नव्हते. अखेर 16 वा वनडे सामना खेळताना त्याने तिहेरी आकडा पार केला.

दरम्यान, शतक पूर्ण केल्यानंतर सॅमसनने 46 व्या षटकात लिझाद विल्यम्सच्या गोलंदाजीवर रिझा हेंड्रिक्सकडे झेल देत विकेट गमावली. सॅमसनने 114 चेंडूत 108 धावांची खेळी केली. या खेळीत त्याने 6 चौकार आणि 3 षटकार मारले.

आठवा भारतीय

सॅमसन दक्षिण आफ्रिकेमध्ये दक्षिण आफ्रिकेविरुद्ध वनडेत शतक करणारा आठवा भारतीय फलंदाज आहे. त्याच्यापूर्वी विराट कोहलीने 3 शतके केल आहेत, तर शिखर धवन, रोहित शर्मा, सचिन तेंडुलकर, सौरव गांगुली, युसूफ पठाण आणि वुर्केरी रमन यांनी प्रत्येकी एक शतक केले आहे.