Rohit Sharma: भारत विरुद्ध श्रीलंका संघात गुवाहाटी येथे होत असलेल्या वनडे मालिकेतील पहिल्या सामन्यात भारताने दमदार सुरुवात केली. भारताकडून कर्णधार रोहित शर्माने अर्धशतकी खेळी केली. या खेळीबरोबरच त्याने एका विक्रमाला गवसणी घातली आहे.

रोहितने या सामन्यात सुरुवातीपासूनच आक्रमक पवित्रा स्विकारला होता. त्याने 41 चेंडूत त्याचे अर्धशतकही पूर्ण केले. हे त्याचे वनडे क्रिकेटमधील त्याचे 47 वे अर्धशतक ठरले. त्यामुळे अनेक चाहत्यांनी रोहितचा जुना अंदाज पुन्हा पाहायला मिळाल्याची भावना व्यक्त केली.

(Rohit Sharma completes 9500 runs in ODI Cricket)

गेल्या वर्षात रोहित फार चांगल्या फॉर्ममध्ये नव्हता. त्याला मोठी खेळीही करता आली नव्हती. पण नव्या वर्षात रोहितने अर्धशतकासह चांगली सुरुवात केली आहे.

मात्र, रोहितला या अर्धशतकाचे रुपांतर शतकामध्ये करण्यात अपयश आहे. तो 67 चेंडूत 83 धावा करून बाद झाला. या खेळीत त्याने 9 चौकार आणि 3 षटकार मारले. पण या खेळीदरम्यान त्याने वनडेत 9500 धावांचा टप्पा पार केला आहे.

वनडेमध्ये 9500 धावा करणारा तो भारताचा सहावा खेळाडू ठरला. त्याच्या नावावर आता 236 वनडे सामन्यांत 48.90 च्या सरासरीने 9537 धावांची नोंद आहे. यात त्याच्या 29 शतके आणि 47 अर्धशतकांचा समावेश आहे.

यापूर्वी भारताकडून सचिन तेंडुलकर (18426), विराट कोहली (12510*), सौरव गांगुली (11363), राहुल द्रविड (10889) आणि एमएस धोनी (10773) यांनी 9500 वनडे धावांचा टप्पा पार केला आहे.

या सामन्यात रोहितने शुभमन गिलबरोबर शतकी भागीदारी केली. त्याच्यात आणि शुभमन सलामीला 143 धावांची भागीदारी झाली. गिलनेही अर्धशतकी खेळी केली. गिल 60 चेंडूत 70 धावा करून बाद झाला.