Virat Kohli and Faf du Plessis react on on-field spat: इंडियन प्रीमियर लीग 2023 स्पर्धेत सोमवारी रॉयल चॅलेंजर्स बेंगलोरने लखनऊ सुपर जायंट्सविरुद्ध 18 धावांनी विजय मिळवला. पण भारतरत्न श्री अटल बिहारी वाजपेयी एकाना क्रिकेट स्टेडियमवर झालेला हा सामना विराट कोहलीचे लखनऊचे खेळाडू आणि मार्गदर्शक गौतम गंभीर यांच्याबरोबर झालेल्या वादामुळे चांगलाच चर्चेत आला.

बेंगलोरने दिलेल्या 127 धावांच्या आव्हानाचा पाठलाग करत असताना लखनऊकडून अमित मिश्रा आणि नवीन-उल-हक फलंदाजी करत होते. त्यावेळी बेंगलोरकडून क्षेत्ररक्षण करत असलेला विराटचे त्यांच्याशी शाब्दिक वाद झाले.

त्यानंतर हा वाद संपल्यानंतर आणखी वाढला. सामना झाल्यानंतरही विराट आणि नवीन यांच्यात हात मिळवत असताना वाद झाले. पुढे गंभीर आणि विराट यांच्यात कडाक्याची भांडणं झाली. त्यामुळे वातावरण चांगलंच तापलं होतं. पण विजय मिळवल्याने बेंगलोरच्या गोटात आनंद पसरलेला होता.

दरम्यान बेंगलोरने सामन्यानंतर ड्रेसिंग रुममधील वातावरणाचा व्हिडिओ शेअर केला आहे. त्यामध्ये बेंगलोरचे खेळाडू त्यांचा विजय साजरा करताना दिसत आहेत. याच दरम्यान विराट आणि बेंगलोरचा कर्णधार फाफ डू प्लेसिस यांची या सामन्यात झालेल्या भांडणाबद्दलची प्रतिक्रियाही समोर आली आहे.

या व्हिडिओमध्ये दिसते की विराट म्हणत आहे की 'जर तुम्ही तसं वागू शकता, तर त्याचे परिणाम पण सहन करा, नाहीतर तसं वागूच नका.'

तसेच विराट म्हणाला की 'हा खूप चांगला विजय होता. हा पुढील मार्गाचा विचार केल्यास आमच्यासाठी खूप महत्त्वाचा विजय होता. हा खूप कारणांसाठी एक चांगला विजय होता. विशेषत: आम्ही धावांचा बचाव ज्या प्रकारे केला. मला वाटते की प्रत्येकाला विश्वास होता की आम्ही हा सामना जिंकू शकतो. शेवटी आम्ही विजयी संघ ठरलो, जे खूप छान आहे.'

'हा विजय चांगला होता आणि खरंतर आम्हाला प्रेक्षकांकडूनही मोठा पाठिंबा मिळाला, त्यामुळे अविश्वसनीय वाटत आहे. यातून हेच दिसते की आम्हाला संघ म्हणून किती पसंती दिली जात आहे आणि कसे लोक मैदानात येऊन आम्हाला पाठिंबा देत आहेत.'

तसेच फाफने विराटच्या आक्रमकपणाबद्दल भाष्य केले आहे. तो म्हणाला, 'ते विराटचे व्हर्जन आहे. जेव्हा तो सर्वोत्तम कामगिरी करत असतो, तेव्हा तुम्ही त्याला उत्साहात पाहाल. या सामन्याचा भाग होणे छान होते. माझे काम होते की मैदानात गोष्टी शांत राहातील आणि मला वाटते की मी ते चांगले केले.'

बेंगलोरचा विजय

या सामन्यात बेंगलोरने प्रथम फलंदाजी करताना 20 षटकात 9 बाद 126 धावा केल्या होत्या. बेंगलोरकडून कर्णधार फाफ डू प्लेसिसने सर्वाधिक 44 धावांची खेळी केली. तसेच विराटने 31 धावा केल्या. बाकी कोणाला खास काही करता आले नाही. लखनऊकडून नवीनने सर्वाधिक 3 विकेट्स घेतल्या.

तसेच 127 धावांच्या आव्हानाचा पाठलाग करताना लखनऊचा संघ 19.5 षटकात 108 धावांवरच सर्वबाद झाला. लखनऊकडून कृष्णप्पा गॉथमने सर्वाधिक 23 धावा केल्या. बाकी कोणाला 20 धावांचा टप्पाही ओलांडता आला नाही. बेंगलोरकडून जौश हेजलवूड आणि कर्ण शर्मा यांनी प्रत्येकी 2 विकेट्स घेतल्या.