भारतीय भालाफेकपटू नीरज चोप्रा याने कॉमनवेल्थ गेम्स 2026 मध्ये दमदार कामगिरी करत रौप्यपदकाची कमाई केली. दुखापतीनंतर पुनरागमन करत त्याने पुन्हा एकदा आपल्या सातत्यपूर्ण खेळाची छाप सोडली. या यशासह नीरज कॉमनवेल्थ गेम्सच्या इतिहासात भालाफेक स्पर्धेत सुवर्ण आणि रौप्य अशी दोन्ही पदके जिंकणारा पहिला भारतीय खेळाडू ठरला. पदक जिंकल्यानंतर नीरजने आपल्या पुनरागमनाबाबत समाधान व्यक्त करताना भारतीय भालाफेकपटूंच्या नव्या पिढीबद्दलही मोठा विश्वास व्यक्त केला.

'भारताकडे आता पदक जिंकणारे अनेक खेळाडू आहेत'

स्पर्धेनंतर प्रसारमाध्यमांशी बोलताना नीरज म्हणाला की, भारतीय भालाफेकीत आता उत्कृष्ट खेळाडू तयार होत आहेत. त्याने कांस्यपदक विजेता यशवीर सिंग याचे विशेष कौतुक करत सांगितले की, मोठ्या स्पर्धेत वैयक्तिक सर्वोत्तम कामगिरी करणे ही मोठी उपलब्धी आहे.

त्याच्या मते, जर तो स्वतः मैदानात नसला किंवा दुखापतीमुळे खेळू शकला नाही, तरी भारताकडे पदक जिंकण्याची क्षमता असलेले अनेक भालाफेकपटू आहेत. यशवीरने 85 मीटरचा टप्पा गाठला असून रोहित यादवही सातत्याने चांगली कामगिरी करत असल्याचे त्याने नमूद केले.

पुनरागमन योग्य दिशेने

नीरजने सांगितले की, या हंगामातील ही त्याची सर्वोत्तम कामगिरी असून दुखापतीनंतरचे पुनरागमन योग्य दिशेने सुरू आहे. आगामी मोठ्या स्पर्धांसाठी तो अधिक तयारी करणार असल्याचेही त्याने स्पष्ट केले.

त्याने याआधीच्या मोठ्या स्पर्धेतील आठवणींनाही उजाळा देत भारतीय खेळाडूंनी एकत्र पोडियमवर उभे राहण्याचा आनंद वेगळाच असल्याचे सांगितले.

थंड हवामानामुळे अडचण

स्पर्धेतील आपल्या कामगिरीबाबत बोलताना नीरजने मान्य केले की, अंतिम फेरीत त्याचा एकच थ्रो अपेक्षेप्रमाणे झाला. ग्लासगोमधील थंड हवामानामुळे सर्वोत्तम कामगिरी करण्यात अडचणी आल्याचे त्याने सांगितले. त्याला उबदार वातावरणात खेळणे अधिक सोयीचे वाटते, असेही तो म्हणाला.

पंतप्रधान मोदींकडून अभिनंदन

पंतप्रधान नरेंद्र मोदी यांनी सोशल मीडियावर पोस्ट करून नीरज चोप्रा आणि कांस्यपदक विजेता यशवीर सिंह या दोघांचे अभिनंदन केले. नीरजच्या सातत्यपूर्ण कामगिरीचे आणि जिद्दीचे कौतुक करत त्यांनी त्याच्या पुढील वाटचालीसाठी शुभेच्छा दिल्या.

याशिवाय, यशवीर सिंहच्या उत्कृष्ट कामगिरीचेही कौतुक करत त्याची ही कामगिरी देशातील युवा खेळाडूंना प्रेरणा देणारी असल्याचे पंतप्रधानांनी नमूद केले.

पुढील लक्ष्य आशियाई क्रीडा स्पर्धा

कॉमनवेल्थ गेम्समधील यशानंतर आता नीरज चोप्राचे लक्ष आगामी आशियाई क्रीडा स्पर्धांकडे लागले आहे. सातत्यपूर्ण कामगिरी कायम ठेवत आणखी एक मोठे पदक जिंकण्याचा त्याचा प्रयत्न असणार असून भारतीय क्रीडाप्रेमींनाही त्याच्याकडून मोठ्या अपेक्षा आहेत.