MS Dhoni returns to CSK : आयपीएल २०२६ (IPL 2026) चा थरार रंगत असताना आज, ३ एप्रिल रोजी चेन्नईच्या एम. ए. चिदंबरम स्टेडियमवर (चेपॉक) घरच्या मैदानावर चेन्नई सुपर किंग्स (CSK) आणि पंजाब किंग्स (PBKS) यांच्यात लढत होणार आहे. ऋतुराज गायकवाडच्या नेतृत्वाखालील सीएसकेला पहिल्या सामन्यात राजस्थान रॉयल्सकडून पराभव स्वीकारावा लागला होता. त्यामुळे आजच्या सामन्यात विजय मिळवण्यासाठी संघ उत्सुक आहे. मात्र, चाहत्यांच्या मनात एकच मोठा प्रश्न आहे - 'एमएस धोनी आज खेळणार का?'

इंजरीमुळे पहिल्या सामन्याला मुकला

हंगामाच्या सुरुवातीलाच एमएस धोनीला 'काफ इंजरी' (स्नायू दुखापत) झाल्याची बातमी समोर आली होती. याच दुखापतीमुळे धोनीला हंगामातील पहिल्या सामन्याला मुकावे लागले होते.

बीसीसीआय आणि सीएसके मॅनेजमेंटने स्पष्ट केले होते की, धोनी सध्या रिहॅब प्रक्रियेतून जात असून तो सुरुवातीचे दोन आठवडे मैदानाबाहेर राहू शकतो. धोनीसारख्या अनुभवी खेळाडूच्या अनुपस्थितीमुळे पहिल्या सामन्यात चेन्नईची फलंदाजी काहीशी कमकुवत भासली होती.

नेट्समधील व्हिडिओ आणि चाहत्यांच्या आशा

दरम्यान, सोशल मीडियावर एक व्हिडिओ तुफान व्हायरल होत आहे, ज्याने चाहत्यांच्या आशा पुन्हा पल्लवित केल्या आहेत. सीएसकेने स्वतः शेअर केलेल्या या व्हिडिओमध्ये धोनी नेट्समध्ये सराव करताना आणि इतर खेळाडूंना मार्गदर्शन करताना दिसत आहे.

नेट्समध्ये बॅटिंगचे कसब दाखवणाऱ्या 'माही'ला पाहून, तो आज पंजाबविरुद्ध मैदानात उतरणार अशी चर्चा रंगली आहे. मात्र, सूत्रांच्या माहितीनुसार, संघ व्यवस्थापन धोनीच्या फिटनेसबाबत कोणतीही घाई किंवा जोखीम पत्करण्यास तयार नाही. तो मैदानात खेळला नाही तरी डगआऊटमध्ये बसून मार्गदर्शन करणे, हे देखील युवा खेळाडूंसाठी मोठे टॉनिक ठरेल.

मागच्या हंगामातील कामगिरी

२०२५ च्या आयपीएल हंगामात धोनीने १३ डावांमध्ये १३५.१७ च्या स्ट्राईक रेटने १९६ धावा केल्या होत्या. यामध्ये १२ चौकार आणि १२ षटकारांचा समावेश होता. चेपॉकच्या मैदानावर धोनीचे रेकॉर्ड नेहमीच जबरदस्त राहिले आहे. अशा परिस्थितीत, आज संध्याकाळी ७:३० वाजता टॉसच्या वेळी ऋतुराज गायकवाड धोनीच्या समावेशाबाबत काय घोषणा करतो, याकडे संपूर्ण जगाचे लक्ष लागले आहे.