लखनऊ: इंडियन प्रीमियर लीग (IPL) २०२६ चा हंगाम सुरू होण्यापूर्वीच मैदानाबाहेर मोठा बदल पाहायला मिळाला आहे. लखनऊ सुपर जायंट्स (LSG) या संघाने आपल्या अधिकृत सोशल मीडिया प्लॅटफॉर्मवरून जुना लोगो हटवला असून, संघ आता एका पूर्णपणे नवीन ओळखीसह मैदानात उतरण्यासाठी सज्ज झाला आहे. या 'रीब्रँडिंग'मुळे चाहत्यांमध्ये उत्सुकता शिगेला पोहोचली असून, लखनऊचा नवा लोगो कसा असेल, याबाबतच्या चर्चांना उधाण आले आहे.

फ्रेन्चायझीकडून चाहत्यांची फिरकी

२०२६ च्या सुरुवातीला चाहत्यांच्या लक्षात आले की, लखनऊ सुपर जायंट्सच्या इंस्टाग्राम, ट्विटर आणि अधिकृत वेबसाईटवरून त्यांचा जुना लोगो अचानक नाहीसा झाला आहे. इतकेच नाही तर, संघाने एक गुढ व्हिडिओ शेअर करत चाहत्यांनाच विचारले की, "अचानक आमचा लोगो कुठे गेला?" या हटके प्रमोशनमुळे सोशल मीडियावर 'LSG New Logo' ट्रेंड होऊ लागला आहे. २०२२ मध्ये पदार्पण करताना वापरलेला निळा आणि नारंगी रंगाचा 'पंख' असलेला लोगो आता इतिहासजमा होणार असल्याचे स्पष्ट झाले आहे.

नव्या लोगोमध्ये 'हत्ती'ची एन्ट्री?

मिळालेल्या माहितीनुसार, नवीन लोगो हा जुन्या पंखांच्या संरचनेवर आधारित असला तरी, त्यात आता एक 'हत्ती' (Elephant Face) जोडण्यात आला असल्याची शक्यता आहे. हत्ती हे शक्ती आणि वैभवाचे प्रतीक मानले जाते, त्यामुळे लखनऊचा हा नवा अवतार अधिक आक्रमक आणि भव्य असणार आहे.

ऋषभ पंतच्या नेतृत्वाखाली आणि मुख्य प्रशिक्षक जॅस्टिन लँगर यांच्या मार्गदर्शनाखाली हा संघ एका 'नव्या उर्जे'सह मैदानात उतरण्यास सज्ज झाला आहे. गेल्या हंगामातील निराशाजनक कामगिरी विसरून हा नवीन लोगो संघासाठी 'नवे पर्व' घेऊन येईल, अशी आशा व्यक्त केली जात आहे.

ऋषभ पंतच्या नेतृत्वाखाली तगडा संघ

लखनऊ सुपर जायंट्सने आयपीएल २०२६ साठी अत्यंत संतुलित संघ तयार केला आहे. ऋषभ पंतसह निकोलस पूरन, मिचेल मार्श आणि एडन मार्कराम यांसारख्या स्फोटक फलंदाजांची फळी संघात आहे. तसेच मोहम्मद शमी, अनरिच नॉर्टजे आणि मयंक यादव यांसारख्या वेगवान गोलंदाजांच्या जोरावर संघ जेतेपदावर नाव कोरण्यासाठी सज्ज आहे. विशेष म्हणजे अर्जुन तेंडुलकरलाही या संघात स्थान मिळाले असून, या 'रिब्रँड' केलेल्या संघाकडून चाहत्यांना मोठ्या अपेक्षा आहेत.