Lionel Messi: अर्जेंटिनाचा स्टार फुटबॉलर लिओनल मेस्सीचे चाहते जगभरात आहेत. भारतातही मेस्सी लोकप्रिय खेळाडूंपैकी एक आहे. अगदी मोठमोठ्या सेलिब्रेटींपासून ते सामान्य जनतेपर्यत त्याची लोकप्रियता दिसून येते. आता तर त्याने स्वाक्षरी केलेली त्याची जर्सी भारतीय क्रिकेट नियामक मंडळाचे सचिव जय शाह यांच्यासाठी पाठवली आहे.

भारतीय संघाचा माजी क्रिकेटपटू आणि गव्हर्निंग कौन्सिलमध्ये इंडियन क्रिकेटर्स असोसिएशनचे प्रतिनिधित्व करणारा प्रज्ञान ओझाने जय शाह यांचा मेस्सीची जर्सी हातात घेतलेला फोटो सोशल मीडियावर शेअर केला आहे.

या फोटोवर ओझाने कॅप्शन दिले आहे की 'दिग्गजाने त्याच्या शुभेच्छा आणि स्वाक्षरी केलेली मॅच जर्सी जय भाईंसाठी पाठवली आहे. प्रामाणिक व्यक्तिमत्त्व. आशा आहे की मलाही अशी जर्सी लवकरच मिळेल.'

(Lionel Messi send a signed jersey to the secretary of BCCI Jay Shah.)

मेस्सी नुकताच त्याच्या कारकिर्दीतील पाचवा आणि अखेरचा फुटबॉल वर्ल्डकप खेळला. त्याने हा वर्ल्डकप खेळताना अर्जेंटिनाला तब्बल 36 वर्षांनंतर विजेतेपदही जिंकून दिले. मेस्सीने या वर्ल्डकपमध्ये 7 गोल केले आणि 3 असिस्टही नोंदवले. त्याने त्याच्या कारकिर्दीत पाच वर्ल्डकपमध्ये 13 गोल नोंदवले आहेत.

तो फिफा वर्ल्डकप 2022 मधील सर्वोत्तम खेळाडूही ठरला. त्यामुळे तो वर्ल्डकपमध्ये दोनवेळा गोल्डन बॉल जिंकणारा पहिला खेळाडू ठरला. त्याने 2014 वर्ल्डकपमध्येही गोल्डन बॉल जिंकला होता.

तसेच मेस्सीने फिफा वर्ल्डकप 2022 मध्ये आणखी एक मोठा विक्रम आपल्या नावावर केला. तो एकाच वर्ल्डकपमध्ये साखळी फेरी, उपउपांत्यपूर्व फेरी, उपांत्यपूर्व फेरी, उपांत्य फेरी आणि अंतिम सामन्यात गोल करणारा पहिलाच खेळाडू ठरला.

तसेच आत्तापर्यंत मेस्सीने फुटबॉलमधील जवळपास सर्वच विजेतेपदे नावावर केले होते. पण केवळ वर्ल्डकपची कमी होती, ती कमीही मेस्सीने फिफा वर्ल्डकप 2022 चे विजेतेपद जिंकून पूर्ण केली आहे.