Lionel Messi to Inter Miami:: अर्जेंटिनाचा स्टार फुटबॉलपटू लिओनल मेस्सी गेली दोन वर्षे पॅरिस सेंट-जर्मेन (PSG) संघाकडून खेळत होता. पण आता या क्लबचा आणि मेस्सीचा मार्ग वेगळा झाला आहे. अशातच मेस्सी आता कोणत्या संघाकडून खेळणार अशा चर्चा होत आहेत.

पण नुकत्यात समोर आलेल्या बीबीसीच्या रिपोर्ट्सनुसार मेस्सी इंटर मियामी या अमेरिकन फुटबॉल क्लबमध्ये सामील होणार असल्याचे म्हटले जात आहे.

सात वेळचा बॅलन डी'ओर विजेता मेस्सी ऍपल आणि आदिदास यांसारख्या ब्रँडशीही मियामीबरोबरच्या कराराचा भाग म्हणून कोलॅबरेशन करणार असल्याचे म्हटले जात आहे.

तसेच मीडिया रिपोर्ट्सनुसार मेस्सीने सौदी अरेबियातील अल हिलाल क्लबने दिलेली महागड्या कराराची ऑफर नाकारली आहे. तसेच त्याने आता अमेरिकेत फुटबॉल खेळण्याचा निर्णय घेतला आहे.

लक्षात घेण्यासारखी गोष्ट अशी की याआधी ख्रिस्तियानो रोनाल्डो आणि करिम बेंझेमा सारख्या खेळाडूंनी सौदी अरेबियामध्ये खेळण्याला पसंती दिली असून रोनाल्डो अल-नासरकडून खेळत असून बेंझमा अल-इत्तिहाद क्लबकडून खेळत आहे.

दरम्यान, जर मेस्सीने खरंच मियामीबरोबर करार केला, तर तो पहिल्यांदाच युरोपबाहेरील क्लबकडून फुटबॉल खेळताना दिसेल. त्याने यापूर्वी बार्सिलोना आणि पीएसजी या युरोपमधील क्लबकडून फुटबॉल खेळले आहे.

गेल्या काही दिवसांपासून अशीही चर्चा होती की मेस्सी पुन्हा त्याच्या जुन्या बार्सिलोना क्लबमध्ये परतेल. त्याचे वडील जॉर्ज मेस्सी बार्सिलोनाचे अध्यक्ष जॉन लापोर्टा यांना या आठवड्याच्या सुरुवातीला भेटले होते. त्यामुळे मेस्सी पुन्हा बार्सिलोनात येऊ शकतो, या चर्चांना उधाण आले होते.

पण आता बीबीसीच्या रिपोर्ट्सनुसार मेस्सीने अमेरिकन फुटबॉल क्लबकडून खेळण्याचा निर्णय घेतला आहे.

मेस्सी आणि पीएसजीचा मार्ग झाला वेगळा

काही दिवसांपूर्वी मेस्सीने शनिवारी पीएसजीकडून क्लेरमाँटविरुद्ध लीग-1 मधील अखेरचा सामना खेळला. पण या सामन्यात पीएसजीला 2-3 अशा गोल फरकाने पराभव स्विकारावा लागला. या सामन्यानंतर मेस्सीचा पीएसजीबरोबरील करार संपुष्टात आला आहे.

मेस्सी गेली दोन वर्षे पीएसजीकडून खेळत होता. बार्सिलोनाबरोबर तब्बल १७ हंगाम खेळल्यानंतर करार संपल्यावर तो 2021 मध्ये पीएसजीमध्ये सामील झाला होता. पीएसजीकडून तो गेल्या दोन हंगामात 75 सामन्यांमध्ये 32 गोल केले. तसेच 35 असिस्ट केले.