IPL 2026 Points Table Today: आयपीएल 2026 च्या हंगामात आता रंगत वाढली असून गुणतालिकेतील गणिते दररोज बदलताना दिसत आहेत. गुरुवारी (23 एप्रिल) झालेल्या हाय-व्होल्टेज सामन्यात चेन्नई सुपर किंग्सने मुंबई इंडियन्सचा 103 धावांनी दारुण पराभव केला. या विजयामुळे चेन्नईने केवळ दोन गुणच मिळवले नाहीत, तर नेट रनरेटमध्ये मोठी सुधारणा करत गुणतालिकेत थेट पाचव्या क्रमांकावर झेप घेतली. चेन्नईच्या या धडाकेबाज कामगिरीमुळे मुंबई इंडियन्ससह दिल्ली कॅपिटल्स आणि गुजरात टायटन्स या संघांना मोठा फटका बसला.

सध्याच्या गुणतालिकेवर नजर टाकली तर, श्रेयस अय्यरच्या नेतृत्वाखालील पंजाब किंग्स 11 गुणांसह अजूनही अव्वल स्थानी विराजमान आहे. राजस्थान रॉयल्स 10 गुणांसह दुसऱ्या क्रमांकावर असून त्यांनी आपले स्थान भक्कम केले. रॉयल चॅलेंजर्स बंगळुरु 8 गुणांसह तिसऱ्या आणि सनरायझर्स हैदराबाद 8 गुणांसह चौथ्या स्थानावर आहे. चेन्नई सुपर किंग्स, दिल्ली कॅपिटल्स आणि गुजरात टायटन्स या तिन्ही संघांकडे प्रत्येकी 6 गुण आहेत, मात्र मुंबईविरुद्धच्या मोठ्या विजयामुळे चेन्नईचा नेट रनरेट कमालीचा सुधारला असून ते पाचव्या स्थानी पोहोचले.

दुसरीकडे, मुंबई इंडियन्सची (Mumbai Indians) अवस्था मात्र अत्यंत चिंताजनक झाली असून 7 सामन्यांनंतर त्यांच्या खात्यात केवळ 4 गुण आहेत. लखनऊ सुपर जायंट्सची स्थितीही अशीच असून कोलकाता नाईट रायडर्स 3 गुणांसह तळाला संघर्ष करत आहे.

आज म्हणजेच 24 एप्रिल, शुक्रवारी आयपीएलमध्ये पुन्हा एकदा मोठा सामना रंगणार आहे. बंगळुरुच्या एम. चिन्नास्वामी स्टेडियमवर घरच्या मैदानावर आरसीबी आणि गुजरात टायटन्स आमनेसामने येतील. आरसीबीकडे (RCB) सध्या 8 गुण असून आजचा सामना जिंकल्यास ते 10 गुणांसह राजस्थान रॉयल्सला मागे टाकत दुसऱ्या क्रमांकावर पोहोचू शकतात. दुसरीकडे, सातव्या क्रमांकावर असलेला गुजरात टायटन्सचा संघ हा सामना जिंकून चेन्नईला मागे टाकत पाचवे स्थान मिळवण्यासाठी मैदानात उतरेल.