CV Bhavani Devi won India's 1st Bronze Medal at Asian Fencing Championships: भारताची ऑलिम्पियन तलवारबाज सीए भवानी देवीने सोमवारी चीनमधील वुक्सी येथे झालेल्या आशियाई तलवारबाजी चॅम्पियनशीप स्पर्धेत इतिहास रचला आहे. तिने या स्पर्धेत कांस्य पदकाची कमाई केली आहे. या स्पर्धेतील भारताचे हे पहिलेच पदक आहे.

तिला उपांत्य सामन्यात सोमवारी पराभवाचा सामना करावा लागला, त्यामुळे तिची अंतिम सामन्यात जाण्याची संधी हुकली. त्यामुळे तिला कांस्य पदकावर समाधान मानावे लागले.

अटीतटीच्या झालेल्या उपांत्य सामन्यात भवानी देवीला उझबेकिस्तानच्या जेनाब डेयिबेकोवाविरुद्ध 14-15 अशा फरकाने पराभवाचा सामना करावा लागला. पण तिने ज्यावेळी उपांत्य फेरीत प्रवेश केला होता, त्याचवेळी पदक निश्चित करत इतिहालासाला गवसणी घातली होती. फक्त ती कोणते पदक जिंकणार, याची प्रतिक्षा होती.

भवानी देवीने उपांत्यपूर्व फेरीत सध्याची वर्ल्ड चॅम्पियन मिसाकी एमुरा हिला १५-१० अशा फरकाने पराभूत करत उपांत्य फेरी गाठली होती. जपानच्या मिसाकीविरुद्ध हा तिचा पहिला विजय देखील होता. यापूर्वी तिने मिसाकीविरुद्धच्या सर्व सामन्यांमध्ये पराभवाचा सामना केला होता.

भवानी देवीने त्याआधी या स्पर्धेत राउंड ऑफ 64 मध्ये कझाकस्तानच्या डोस्पे करीनाला पराभूत केले होते, तर उपउपांत्यपूर्व फेरीत तिसऱ्या मानांकित ओजाकी सेरीला पराभूत केले होते.

दरम्यान, भारतीय तलवारबाजी संघाचे महासचिव राजीव मेहता यांनीही तिच्या ऐतिहासिक यशाचे कौतुक करताना म्हटले की हा सन्मानाचा दिवस आहे. तसेच त्यांनी आशा केली आहे की ती लवकरत सुवर्णपदकही जिंकेल.

तसेच भारताचे केंद्रिय क्रीडामंत्री अनुराग ठाकूर यांनीही ट्वीट करत तिचे कौतुक केले आहे. त्यांनी ट्वीटमध्ये म्हटले की 'भवानीचा शानदार पराक्रम. भवानी देवीने वरिष्ठ आशियाई चॅम्पियनशीप स्पर्धेत भारतासाठी पहिले पदक जिंकत इतिहास रचला.' तसेच त्यांनी तिच्या इथपर्यंतच्या प्रवासाचेही कौतुक केले आहे.

भवानी देवीने यापूर्वी ऑलिम्पिकमध्येही सहभागी होत इतिहास रचला होता. ती ऑलिम्पिकसाठी पात्र ठरलेली भारताची पहिली तलवारबाज आहे. तिने टोकिटो ऑलिम्पिकमध्ये सहभाग नोंदवला होता. पण तिला या स्पर्धेत राऊंड ऑफ 32 मधून बाहेर जावे लागले होते.